नांदेड जिल्ह्यात बांधावर खते-बियाणे; शेतकरी गटामार्फत होतेय वाटप..!

शेतकऱ्यांना पेरणीसाठी लागणारे बी-बीयाणे आणि रासायनिक खतं खरेदीसाठी कृषी सेवा केंद्रावर गर्दी होऊ नये, म्हणून कृषी विभागाने चांगला निर्णय घेतला आहे. आता शेतकऱ्यांना बांधावर बी-बीयाणे मिळणार आहेत.

नांदेड -आता खरीप हंगाम जवळ आला आहे. पेरणीसाठी लागणारे बी-बीयाणे आणि रासायनिक खत खरेदीसाठी कृषी सेवा केंद्रावर गर्दी होऊ नये, म्हणून कृषी विभागाने चांगला निर्णय घेतला आहे. यावर्षी कृषी विभागाच्या आत्मायोजने अंतर्गत नोंदणीकृत शेतकरी गटांमार्फत, शेतकऱ्यांना बांधावर बी-बीयाणे आणि खत उपलब्ध करून देण्याचा निर्णय घेण्यात आला आहे.

या निर्णयानुसार आज (शनिवार) नांदेड जिल्ह्याच्या कंधार तालुक्यातील बीजेवाडी येथील वसंतराव नाईक शेतकरी गटाच्या वतीने एकत्रीत कृषी निविष्ठांची खरेदी करण्यात आली. त्यानंतर शेतकऱ्यांना त्यांच्या बांधावर जाऊन बी-बियाणे देण्याच्या योजनेचा शुभारंभ लोहा विधानसभा मतदारसंघाचे आमदार शामसुंदर शिंदे यांच्या हस्ते करण्यात आला. यावेळी तालुका कृषी अधिकारी रमेशराव देशमुख हेही उपस्थित होते. वसंतराव नाईक शेतकरी गटाच्या वतीनं शेतकऱ्यांनी कृषी विभागाचे आभार मानले.