नांदेड- कोरोनाच्या पार्श्वभूमीवर देशातील विमानांच्या फेर्‍यांमध्ये एका बाजूस कपात सुरू असताना नांदेडहून मात्र आता दररोज विमानाने मुंबईला जाता येणार आहे. या सोबतच नांदेड शहर हवाई मार्गाने जळगाव आणि अहमदाबादला 2 मार्चपासून जोडले जाईल.
गुरुद्वारामुळे जगभरातील भाविकांची असते मोठे गर्दी
नांदेड येथे उत्तम दर्जाचे विमानतळ असून या विमानतळावर नाईट लँडीगची सुविधा उपलब्ध आहे. येथील गुरुद्वारामुळे जगभरातील भाविक मोठ्या प्रमाणात नांदेडला येत असतात. यापूर्वी नांदेडहून मुंबई, हैदराबाद, नागपूर, दिल्ली आदी ठिकाणी विमानसेवा सुरू होती. परंतु कोरोनाच्या पार्श्वभूमीवर काहीकाळ विमानसेवा पूर्णतः खंडित केल्यानंतर ट्रुजेट या कंपनीने हैदराबाद-नांदेड-मुंबई व मुंबई-नांदेड-हैदराबाद ही परतीची सेवा असलेली मंगळवार, बुधवार व गुरुवार या आठवड्यातील तीन दिवसांसाठी विमानसेवा सुरू करण्यात आली आहे.
रविवारीही करता येणार विमानाने प्रवास
नांदेडमधील हवाई प्रवाशांची वाढती संख्या लक्षात घेवून मुंबईला जाण्यासाठी दररोज विमान असले पाहिजे अशी आग्रही भूमिका पालकमंत्री अशोक चव्हाण यांनी घेतली. त्यांच्याच पुढाकारातून आता आठवड्यातील उर्वरित चार दिवशी म्हणजेच सोमवार, शुक्रवार, शनिवार व रविवार या दिवशीही म्हणजेच दररोज मुंबईला जाण्यासाठी नांदेडकरांना विमानाची सोय असणार आहे. चार दिवस नव्याने सुरू होणार्‍या या विमानाने नांदेडच्या प्रवाशांना जळगाव आणि अहमदाबाद असाही प्रवास करता येणार आहे.
यापूर्वीचीही विमान सेवा सुरूच राहणार
यापूर्वी सुरू असलेली ट्रुजेटची आठवड्यातील तीन दिवसांची विमानसेवा तशीच राहणार असून उर्वरित चार दिवसात ट्रुजेटचे विमान सकाळी 9.45 वाजता अहमदाबादहून निघून जळगावला 11.5 वाजता पोहोचणार आहे. 11.30 वाजता जळगावहून निघून हे विमान 12.45 वाजता मुंबईला पोहोचेल. मुंबईहून 1.25 वाजता निघणारे हे विमान नांदेड येथे 3 वाजता येईल. नांदेड येथून 3.30 वाजता हे विमान मुंबईकडे रवाना होईल. मुंबई विमानतळावर 5 वाजता पोहोचून 5.30 वाजता जळगावांकडे उड्डान करेल. 7.05 वाजता जळगावहून निघून रात्री 8.25 मिनिटाला अहमदाबाद येथे विमान पोहोचेल.
हेही वाचा -विदर्भातून येणाऱ्या वाहनांची कसून तपासणी; माहूरजवळ उभारली छावणी...!
