दूषित पाणीपूरवठा: मुदखेड नगरपालिके समोर भाजपचे आंदोलन...

मुदखेड शहर हा काँग्रेसचा बालेकिल्ला मानला जातो. मुदखेड नगरपालिकेवर गेल्या दोन दशकापासून काँग्रेसची एकहाती सत्ता आहे. मुदखेड शहरांमध्ये विविध योजनांअंतर्गत अनेक ठिकाणी जलकुंभाची उभारणी करण्यात आली.

नांदेड - जिल्ह्यातील मुदखेड शहरात मागील काही दिवसांपासून दुषित पाणी पुरवठा होत आहे. यामुळे मुदखेड शहरातील नागरिकांच्या आरोग्याच्या प्रश्न ऐरणीवर आला आहे. मुदखेड शहर नगरपालिकेच्या या दुषित पाणी पुरवठ्यावर भाजपने आक्रमक भूमिका घेतली आहे. मुदखेड नगरपालिके समोर घोषणाबाजी करुन आंदोलन करण्यात आले. सत्ताधारी काँग्रेस सर्वच पातळ्यांवर अपयशी ठरल्याचा आरोप करत मुदखेड नगरपालिका बरखास्त करवी, अशी मागणी भाजपचे प्रविण गायकवाड यांनी मुख्यमंत्री उद्धव ठाकरे यांच्याकडे निवेदनाद्वारे केली.

मुदखेड शहर हा काँग्रेसचा बालेकिल्ला मानला जातो. मुदखेड नगरपालिकेवर गेल्या दोन दशकापासून काँग्रेसची एकहाती सत्ता आहे. मुदखेड शहरांमध्ये विविध योजनांअंतर्गत अनेक ठिकाणी जलकुंभाची उभारणी करण्यात आली. त्यातील काही जलकुंभ आज भग्न अवस्थेत आहेत. तर काहींचा उपयोग होत नाही. मुदखेड नगरपालिकेसमोर आंदोलन करुन नगरपालिकेच्या विरोधात घोषणाबाजी करण्यात आली. सदरील निवेदनावर प्रविण गायकवाड, भाजपचे तालुकाध्यक्ष शंकर मुतकलवाड, शहराध्यक्ष संजय सोनटक्के, युवा मोर्चाचे ज्ञानेश्वर पवार यांच्यासह इतरही भाजप कार्यकर्ते यांच्या स्वाक्षऱ्या आहेत.