नांदेड- कोरोना विषाणूच्या प्रसारामुळे निर्माण झालेल्या परिस्थितीमुळे जिल्ह्यासह इतर राज्यातील एकही व्यक्ती, मजूर, हमाल, रोजंदारी कर्मचारी उपाशी राहणार नाही याची काळजी घ्यावी, अशा सूचना राज्याचे सार्वजनिक बांधकाम मंत्री तथा नांदेड जिल्ह्याचे पालकमंत्री अशोक चव्हाण यांनी जिल्हा प्रशासनाला दिल्या.
#COVID-19 : एकही गरजू व्यक्ती उपाशी राहणार नाही याची काळजी घ्या - पालकमंत्री अशोक चव्हाण - Ashok Chavan
कोरोनाच्या परिस्थितीशी मुकाबला करण्यासाठी चालू असलेल्या कामाचा आढावा पालकमंत्री अशोक चव्हाण यांनी जिल्हाधिकारी कार्यालयात घेतला. रक्तदान करणाऱ्यांच्या संख्येत वाढ होण्यासाठी प्रयत्न करण्याबाबत देखील त्यांनी सूचना दिल्या.
एकही गरजू व्यक्ती उपाशी राहणार नाही याची काळजी घ्या- पालकमंत्री अशोक चव्हाण
कोरोनाच्या परिस्थितीशी मुकाबला करण्यासाठी चालू असलेल्या कामाचा आढावा पालकमंत्री अशोक चव्हाण यांनी जिल्हाधिकारी कार्यालयात घेतला. यावेळी जिल्हाधिकारी डॉ. विपीन इटनकर, माजी राज्यमंत्री डी. पी. सावंत, अप्पर जिल्हाधिकारी खुशालसिंह परदेशी, निवासी उपजिल्हाधिकारी डॉ. सचिन खल्लाळ आदी या वेळी उपस्थित होते. सध्याच्या परिस्थितीमध्ये जिल्ह्यात वास्तव्यास असणारे परराज्यातील कामगार व जिल्ह्यातील एकही व्यक्ती उपाशी राहणार नाही याबाबत पालकमंत्र्यांनी महत्वाच्या सूचना केल्या.
जिल्हाधिकारी कार्यालयातील नियंत्रण कक्ष सतर्क ठेवून संपर्क करणाऱ्यांची तत्काळ दखल घेण्यात यावी. त्यांना वेळेत मदत करावी. जिल्ह्यात कुठेही रक्तदान करता येईल किंवा तालुकास्तरावर कुठेही रक्तदान करता येईल यासाठी प्रयत्न करावेत,अशा सूचना अशोक चव्हाण यांनी दिल्या. जिल्ह्यातील विविध ठिकाणी अडकलेल्या नागरिकांसाठी चालू असलेल्या मदत केंद्रातील सोयी सुविधांबाबत महत्वाच्या सूचनाही चव्हाण यांनी यावेळी दिल्या.