नांदेड - मुदखेड तालुका येथील वाळूमाफिया करत असलेल्या अवैध रेती उत्खननाविरोधात तहसील कार्यालयाच्या तीन विशेष पथकाने अचानक धाडी टाकल्या. या धाडीमध्ये एक ट्रॅक्टर, दोन टिप्पर, दोन जेसीबी मशीन अशा चार वाहनमालकांवर कारवाई करण्यात आली. यावेळी एकूण १७ लाख ७ हजार रूपयांची दंडात्मक कारवाई केली गेल्याचे तहसीलदार दिनेश झांपले यांनी सांगितले.
नांदेडमधल्या वाळूमाफियांवर दंडाची कारवाई. लोकसभा निवडणूकीत प्रशासन व्यस्त असल्याने वाळूमाफियांनी त्याचा फायदा उचलला. त्यामुळे मुदखे़ड तालुक्यातील वासरी,शंखतिर्थ, टाकळी, खुजडा या गावातून शेकडो ब्रास रेती उत्खनन केली जात होती. गेल्या काही दिवसांपासून या भागात अवैध रेती उत्खनन वाहतूक होत असल्याच्या अनेक तक्रारी महसूल प्रशासनाकडे गेल्यामुळे लोकसभा निवडणुकीची मतमोजणी झाल्याबरोबर लगेचच त्यांच्या विरोधात मोहीम राबवण्यात आली
मे महिन्यातील २४ तारखेच्या मध्यरात्री खुजडा येथे एका ट्रॅक्टरद्वारे (एमएच२६-एआर १४५0)अवैधपणे ब्रास रेती घेऊन जात असल्याचा प्रकार आढळून आला. त्या ट्रॅक्टरमालकाच्या नावे १ लाख दोन हजार रुपयांची दंड भरण्याची नोटीस देण्यात आली आहे.
दुसऱ्या कारवाईत त्याच महिन्याच्या २५ तारखेला पहाटे वासरी शंखतिर्थ शिव रस्त्यालगत दोन टिप्पर (एमएच २६- एडी १११७ व एमएच 0५एमएम ७८९९) प्रत्येकी २.५ ब्रास वाळू अवैधपणे रेती वाहतूक करत असताना आढळून आले. तेव्हा सदर वाहने तहसिल कार्यालयात जमा करून संबधित वाहन मालकावर प्रत्येकी १ लाख ५ हजार रूपये दंड भरण्याची नोटीस देण्यात आली आहे.
तिसऱया कारवाईत २६ तारखेला रात्रीच्या वेळी तक्रार प्राप्त झाल्याने तहसील कार्यालयाच्या पथकाने अचानक धाड टाकली. गोदावरीच्या नदी पात्रातील जेसीबी मशीन जप्त करण्यात आल्या. दुसऱ्या दिवशी या मशीन पोलीस बंदोबस्तात तहसील कार्यालयात लावण्यात आल्या आहेत. मशीन मालकांवर ७ लाख ५० हजार रु. दंडाच्या वसुलीची कारवाई करण्यात आली आहे.
