नांदेडमध्ये सराफा व्यापारी लूटमारप्रकरणी ८ जणांविरुद्ध दरोड्याचा गुन्हा दाखल

गोकुळनगर भागात सराफा व्यापाऱ्याला लूटमार करून अपहरण करण्याचा प्रयत्न करणाऱ्या ७ ते ८ जणांविरुद्ध शिवाजीनगर पोलीस ठाण्यात अपहरणाचा प्रयत्न करणे, मारहाण करणे, कट रचणे यासह दरोड्याचा गुन्हा दाखल करण्यात आला आहे.

नांदेड -गोकुळनगर भागात मंगळवारी सराफा व्यापाऱ्याला लूटमार करून अपहरण करण्याचा प्रयत्न करणाऱ्या आरोपींविरुद्ध दरोड्याचा गुन्हा नोंदवण्यात आला आहे. श्रीनिवास माणिकराव चिटमलवार असे लूटमार झालेल्या व्यापाऱ्याचे नाव आहे.

चिटमलवार हे मंगळवारी रात्री नेहमीप्रमाणे दुकान बंद करून घरी परतले. ते अपार्टमेंटच्या पार्किंगमध्ये स्कुटी लावत असताना तवेरा गाडीमधून आलेल्या लोकांनी त्यांना घेरले. यावेळी तवेरा गाडीमध्ये काही जण बसून होते, तर ३ जणांनी चिटमलवार यांच्या हातातील बॅग हिसकावून घेतली. दरम्यान, आरोपींनी चिटमलवार यांना तवेरा गाडीकडे ओढून पळवून नेण्याचा प्रयत्न केला. मात्र, चिटमलवार यानी आरडाओरड केल्याने चोरट्यांनी त्यांच्या गळ्यातील चैन ओढून घेतली. या घटनेत चिटमलवार यांची सोन्याची चैन (७५ हजार) तसेच पिशवीत असलेले ७० हजार रुपये असे एकूण १ लाख ४५ हजार रुपयांच्या ऐवजासह दुकानाच्या चाव्या, बँकेचे पासबूक, चेकबूक आणि इतर कागदपत्रे पळवळी आहेत.

याप्रकरणी श्रीनिवास चिटमलवार यांनी दिलेल्या तक्रारीवरून आरोपी गोविंद दत्तात्रय नलबलबार (उमरा), गणेश जगन्नाथ फरकंडे (परभणी), सुरेश पोकलवार (भोकर) यांच्यासह इतर ७ ते ८ जणांविरुद्ध शिवाजीनगर पोलीस ठाण्यात अपहरणाचा प्रयत्न करणे, मारहाण करणे, कट रचणे यासह दरोड्याचा गुन्हा दाखल करण्यात आला आहे. पुढील तपास सहायक पोलीस निरीक्षक पठाण करत आहेत.

सोमवारी रात्री अचानक घडलेल्या या घटनेमुळे गोकुळनगरसह शिवाजीनगर आणि शहरातील अन्य भागातही मोठी खळबळ उडाली होती. रात्री पोलिसांनी नाकाबंदी लावली होती. मात्र,पोलिसांना या प्रकरणाचे कोणतेही धागेदोरे हाती लागले नव्हते. यानंतर पोलिसांनी या प्रकरणात कसून चौकशी सुरू ठेवली. पोलिसांनी गोविंद दत्तात्रय नलबलवार, गणेश जगन्नाथ फरकंडे, सुरेश पोकलवार या तिघांसह अन्य ७ ते ८ जणांविरुद्ध शिवाजीनगर पोलीस ठाण्यात गुन्हा दाखल करण्यात आला आहे.