नागपूर - लोकांकडून जमवलेले भीशीचे पैसे परत करण्यात अपयशी ठरलेल्या एक युवकाने डोक्यात गोळी झाडून आत्महत्या केल्याची घटना शहरात घडली. आशिष उसरे असे आत्महत्या करणाऱ्या तरुणाचे नाव आहे. आर्थिक कोंडी झाल्यामुळे या तरुणाने शहरातील अजनी पोलीस स्टेशनच्या हद्दीतील जयवंत नगर परिसरातील राहत्या घरी स्वतः वर गोळी झाडून आत्महत्या केली. यासंदर्भात अजनी पोलिसांनी अकस्मात मृत्यूची नोंद केली आहे.
शहरातील कामठी परिसरात या तरुणाचे घर आहे. तेथे तो भीशी चालवण्याचा व्यवसाय करायचा. मात्र, अनेकांनी त्याचे पैसे बुडवल्याने त्याला मोठे आर्थिक नुकसान सहन करावे लागले होते. लोकांनी गुंतवलेले पैसे देण्यास आशिष असमर्थ झाला, तेव्हा अनेकांनी त्याच्यावर आर्थिक फसवणुकीचाही गुन्हा दाखल केला होता. या गुन्ह्यात अटक झाल्यानंतर त्याने काही महिने कारागृहात देखील काढले होते.
कारागृहातून सुटल्यानंतर तो जयवंत नगर येथे राहत असताना देखील पैसे मागणारे त्याच्यापर्यंत पोहचले होते. त्यामुळे त्याची पुन्हा आर्थिक कोंडी झाली होती. याच विवंचनेतून त्याने डोक्यात गोळी झाडून आत्महत्या केली असल्याची माहिती त्याच्या पत्नीने पोलिसांना दिली. यासंदर्भात अजनी पोलिसांनी अकस्मात मृत्यूची नोंद करुन तपास सुरु केला आहे.
