नागपूर -गेल्या काही दिवसांपासून उपराजधानी नागपुरात कोरोना विषाणूचा प्रादुर्भाव वेगाने होत आहे. प्रत्येक दिवशी एक हजार पेक्षा जास्त कोरोनाबाधित रुग्ण पुढे येत असल्यामुळे शासन आणि प्रशासनाची चिंता वाढली आहे. या पार्श्वभूमीवर शनिवार आणि रविवार असे दोन दिवस नागपुरात 'वीकएन्ड कर्फ्यू'चे आयोजन करण्यात आले आहे. यामध्ये लोकांनी आणि व्यावसायिकांनी स्वयंशिस्तीने घरात राहून कोरोना विरुद्धच्या लढाईच्या दुसऱ्या टप्प्यात आपले योगदान देणे अपेक्षित आहे. आज(शनिवारी) अगदी सकाळी-सकाळी उघडणारी दुकाने देखील बंद आहेत. सकाळच्या सत्रात नागपूर बंदला चांगला प्रतिसाद मिळत असल्याचे दिसून येत आहे.
आमचे प्रतिनिधी धनंजय टिपले यांनी शहरातील मुख्य बाजारपेठ असलेल्या सीताबर्डीचा आढावा घेतला नागपुरात कोरोनाचा वाढता प्रादुर्भाव लक्षात घेता प्रशासनाकडून कडक निर्बंध घालण्यात आले आहेत. हे निर्बंध कडक असले तरी नागरिकांच्या आरोग्याच्या दृष्टीने ते हितकारक असल्याचे महापौर दयाशंकर तिवारी आणि पालिका आयुक्त राधाकृष्णन बी यांच्याकडून सांगण्यात आले आहे. नागरिकांनी स्वयंस्फूर्तीने नियम पाळून कोरोनाची साखळी खंडित करण्यासाठी प्रशासनाला मदत करावी, असे आवाहन केले आहे.
शहरात काय सुरू आणि काय बंद -शनिवारी आणि रविवारी नागपूर शहर बंद राहणार आहे. त्यामध्ये अत्यावश्यक सेवा वगळता कुठलीही दुकाने, मॉल, बाजार, नाट्यगृहे, उपहारगृहे, रेस्टॉरंट, सरकारी आणि निमशासकीय, खासगी कार्यालये, मनपाचे कत्तलखाने, शहरातील मास विक्रीची दुकाने सुरू राहणार नसल्याचे प्रशासनाकडून स्पष्ट करण्यात आले आहे. औषधांची दुकाने, दवाखाने, पेट्रोल पंप आणि अत्यावश्यक सेवेतील कार्यालये सुरू राहणार आहेत.
उपद्रव शोध पथकाकडून सातत्याने कारवाई -
कोरोना रुग्णांची संख्या नियंत्रणात यावी यासाठी शहरातील गर्दीच्या ठिकाणी महानगरपालिकेच्या उपद्रव शोध पथकाकडून नियम मोडणाऱ्या नागरिकांवर सातत्याने कारवाई केली जात आहे. तरीदेखील संसर्ग वेगाने होत असल्यामुळे महानगरपालिका प्रशासनाकडून अधिक कडक नियम लागू करण्यात आले आहेत. नागरिकांनी विनाकारण घराबाहेर पडू नये, असे आवाहन प्रशासनाने केले आहे.
