Nitin Gadkari : 'आजकाल ईडी, सीबीआय, इनकम टॅक्स सर्व आहेत, चार्टर्ड अकाउंटंटने..' नितीन गडकरींचे सूचक विधान

केंद्रीय मंत्री नितीन गडकरी यांनी नागपुरात सीए अभ्यासक्रमाच्या विद्यार्थ्यांच्या कॉन्फरन्सला हजेरी लावली. यावेळी बोलताना त्यांनी चार्टर्ड अकाऊंटंट हे अर्थव्यवस्थेचे आधारस्तंभ असल्याचे प्रतिपादन केले. त्यावेळी त्यांनी मोलाचा सल्लाही दिला.

नागपूर :चार्टर्ड अकाउंटंटने कोणाच्याही बॅलन्स शीटवर स्वाक्षरी करण्यापूर्वी पुढील परिणामाचा विचार करावा. कारण एकदा चार्टर्ड अकाउंटंटने बॅलन्स शीट साइन केली म्हणजे लोक निर्धास्त होतात. नंतर मात्र काय होते हे तुम्हाला माहिती आहे. आजकाल ईडी, सीबीआय, इनकम टॅक्स सर्व आहेत, असे सूचक विधान केंद्रीय मंत्री नितीन गडकरी यांनी केले. ते नागपुरात सीए अभ्यासक्रमाच्या विद्यार्थ्यांच्या कॉन्फरन्स मध्ये बोलत होते. इन्स्टिट्यूट ऑफ चार्टर्ड अकाउंटेंट्स ऑफ इंडिया द्वारे ही कॉन्फरन्स आयोजित करण्यात आली होती.

'चार्टर्ड अकाऊंटंट अर्थव्यवस्थेचे आधारस्तंभ' : चार्टर्ड अकाऊंटंट्सचे भारतीय अर्थव्यवस्थेतील योगदान महत्त्वाचे आहे. कृषी, उद्योग आणि सेवा क्षेत्रामधील विकासाचा दर वाढणे, देशात आर्थिक व्यवहार्यता (इकॉनॉमिक व्हायबिलिटी) वाढीस लागणे आणि रोजगाराच्या शक्यता निर्माण होण्यासाठी चार्टर्ड अकाऊंटंट्सची भूमिका महत्त्वाची मानली जाते. ते भारतीय अर्थव्यवस्थेचे आधारस्तंभ आहेत, असे प्रतिपादन केंद्रीय रस्ते वाहतूक व महामार्ग मंत्री नितीन गडकरी यांनी केले आहे.

'स्वाक्षरी करणाऱ्यालाच दोषी ठरविले जाते' : नितीन गडकरी म्हणाले की, या क्षेत्रातील विद्यार्थ्यांनी मेरीटमध्ये येण्याचा प्रयत्न करावाच, पण जास्तीत जास्त ज्ञान प्राप्त करण्यावरही भर द्यावा. या व्यवसायात करियर करताना कायद्याचा सन्मान करणे, पारदर्शकता राखणे, टीम वर्कवर भर देणे आणि सर्वांत महत्त्वाचे म्हणजे सकारात्मकता आणि अहंकार यात अंतर ठेवणे या गोष्टी आवर्जून करायला हव्या. कुठल्याही कागदावर विचार करूनच स्वाक्षरी करा. स्वाक्षरी करण्यापूर्वी आपल्या सहकाऱ्यांशी चर्चा करा. कारण पुढे अडचणी उभ्या झाल्यास स्वाक्षरी करणाऱ्यालाच सर्वांत पहिले दोषी ठरविले जाते, असा सल्ला नितीन गडकरी यांनी दिला.

'परफॉर्मन्स ऑडिट जास्त महत्त्वाचे' : तुम्ही सारे फायनान्शियल ऑडिटच्या क्षेत्रात आहात. ते अत्यंत महत्त्वाचे आहेच. पण, संस्थेच्या आणि व्यक्तिगत पातळीवर परफॉर्मन्स ऑडिटही होणे जास्त गरजेचे आहे, असे मत गडकरी यांनी व्यक्त केले. आपल्या कामातून देशाच्या विकासात योगदान देण्यासाठी चार्टर्ड अकाऊंटंट्सने आऊट ऑफ बॉक्स विचार करण्यावर भर द्यावा, असा सल्लाही त्यांनी दिला.

'शालीनता बाळगा' : कुठल्याही क्षेत्रात शिकण्याची प्रवृत्ती आणि मानवी स्वभाव या दोन गोष्टी अत्यंत महत्त्वाच्या आहेत. स्वभावातील शालीनता इतरांचा सन्मान करून वाढत असते. आपणच सर्वांत हुशार आहोत, ही भावना प्रगतीच्या आड येते. त्यामुळे शालीनता बाळगून आपल्या कामातील गुणवत्ता वाढविण्याचा प्रयत्न करावा, असे आवाहन यावेळी नितीन गडकरी यांनी केले.

हेही वाचा :