नागपूर Maharashtra Assembly Winter Session 2023 :विधिमंडळाच्या हिवाळी अधिवेशनाचा आज सहावा दिवस आहे. मराठा आरक्षण, जुनी पेन्शन आदी विषयांवरून विधिमंडळात विरोधक गरारोळ करण्याची शक्यता आहे.
Live updates
- पनवेल तालुक्यातील गावांमध्ये राबविण्यात येत असलेला नैना प्रकल्प हा आधुनिक भांडवलदारांचा आहे. हा प्रकल्प काही अधिकाऱ्यांना पोसणारा, काही दलाल व बिल्डर्सच्या फायद्यासाठी व त्यांची खळगी भरण्यासाठी असल्याचा गंभीर आरोप विरोधी पक्षनेते दानवे यांनी केला. तसेच शेतकऱ्यांचा हिताचा विचार करून सरकारने हा प्रकल्प तातडीने रद्द करावा, अशी मागणी दानवे यांनी सभागृहात केली. अल्पकालीन चर्चेद्वारे उपस्थित झालेल्या मुद्द्याद्वारे नैना प्रकल्पाबाबत विरोधी पक्षनेते अंबादास दानवे यांनी आज सभागृहात आग्रही भूमिका मांडली.
- महाराष्ट्र काँग्रेसचे प्रदेशाध्यक्ष नाना पटोले म्हणाले, राज्य सरकार ओबीसींसाठी कोणतेही धोरण आखत नाहीत. महाराष्ट्रातील सरकारला ओबीसी आणि मराठा यांच्यात तेढ निर्माण करायची आहे. त्यांना इतके भांडू द्यायचे की त्यांना आरक्षणाचा विसर पडेल. आरक्षणासाठी भाजपानं हा प्लॅन केला असल्याचा आरोप काँग्रेस प्रदेशाध्यक्षांनी केला.
- उपमुख्यमंत्री अजित पवार म्हणाले, राजकीय नेत्यांवर पीएचडी सुरू आहे. पीएचडीबाबतच्या माझ्या विधानाचा विपर्यास व्यक्त करण्यात आला. मी दिलगिरी व्यक्त करतो. कांदा, इथेनॉल आणि दूध दराप्रश्नी चर्चा करण्यासाठी अमित शाह यांची वेळ मागितली आहे. उद्या रात्री १० वाजता त्यांची भेट घेणार आहोत. जुन्या पेन्शन योजनेबाबत कर्मचाऱ्यांनी टोकाची भूमिका घेऊ नये.
- राष्ट्रवादी काँग्रेस-शरद पवार गटाचे नेते रोहित पवार म्हणाले, छगन भुजबळ हे ज्या प्रकारची भाषणे करत आहेत, ते मला मान्य नाही. ते ज्या प्रकारची भाषणे करत आहेत, त्याविरोधात मी आहे. ते म्हणत असतील तर त्यांच्या विरोधात धोका आहे तर नक्कीच सरकारनं याकडे लक्ष द्यावे. त्यांच्या सभोवतालची सुरक्षा वाढवावी. महाराष्ट्रात एखाद्याला जीवे मारण्याची धमकी देणे योग्य नाही, आम्ही याच्या पूर्ण विरोधात आहोत, असेही रोहित पवार यांनी म्हटलं.
बुधवारी सभात्याग-विधिमंडळाच्या हिवाळी अधिवेशनाच्या पाचव्या दिवशी गडचिरोली आणि बुलढाणा येथील जिल्हा स्त्री रुग्णालयात प्रसूतीदरम्यान झालेल्या दोन महिलांच्या मृत्यूला आरोग्य खात्याचा हलगर्जीपणा कारणीभूत असल्याचा आरोप विरोधी पक्षनेते विजय वडेट्टीवार यांनी विधानसभेत केला. आरोग्य मंत्री तानाजी सावंत यांनी याबाबत राजीनामा द्यावा, अशी मागणीही वडेट्टीवार यांनी विधानसभेत केली. आरोग्य विभागाच्या कारभाराचा निषेध करून दोषींवर कडक कारवाईची मागणी करत विरोधी पक्षाच्या सदस्यांनी सभात्याग केला.
मुलांच्या आत्महत्या रोखण्यासाठी सरकारनं उपाययोजना कराव्या : नवी मुंबईत दोन विद्यार्थ्यांनी मानसिक तणावातून आत्महत्या केल्याचं समोर आलंय. या घटना गंभीर आहेत. यावरुन मुलांना किती मानसिक तणाव आहे हे लक्षात येतं. वाढती स्पर्धा, अभ्यासक्रमाचं ओझं अशा कारणांनी या आत्महत्या वाढत आहेत. या आत्महत्या रोखण्यासाठी शासनाने तातडीने उपाययोजना कराव्यात, अशी मागणीही वडेट्टीवार यांनी विधानसभेत केली. नवी मुबंईतील दोन मुलांच्या आत्महत्या झाल्याची घटना घडल्याची माहिती विधानसभेत वडेट्टीवार यांनी दिली. तसंच यावेळी त्यांनी शाळेच्या वेळा बदलण्याचीही मागणी केलीय.