नागपूर - केंद्रीय आरोग्य पथकाने जिल्हाधिकारी कार्यालयात घेतलेल्या आढावा बैठकीत वाढता मृत्यूदर आणि रुग्णसंख्या वाढीवर नियंत्रण मिळवण्यासाठी कॉन्टॅक्ट ट्रेसिंगवर भर देण्याच्या सूचना केल्या. तसेच, नियमांचे काटेकोर पालन करण्यास सांगितले.
हेही वाचा -नागपूरात बेडच्या उपलब्धतेसह अन्य माहितीसाठी समन्वयक कक्षात संपर्क करा- जिल्हाधिकारी
केंद्रीय आरोग्य पथकाने जिल्हाधिकारी कार्यलयात बैठक घेतली. यात नागपूर जिल्ह्याची कोरोनाची प्रत्यक्ष स्थिती, त्यावरील उपाययोजना, कोविड रुग्णांसाठी उपलब्ध आरोग्य सुविधा, कॉन्टॅक्ट ट्रेसिंग, गृह विलगीकरणातील रुग्णांसाठी तयार करण्यात आलेला प्रोटोकॉल, तसेच लसीकरण मोहीम याबद्दल माहिती घेण्यात आली. पथकामध्ये दिल्लीचे एम्स रुग्णालयाचे तज्ज्ञ डॉ. हर्षल साळवे, नागपूर एम्सचे प्रो. डॉ. पी.पी. जोशी हे बैठकीला उपस्थित होते.
बैठकीत कोरोना साथीच्या नियंत्रणासाठी जिल्हा प्रशासन जिल्ह्यात कोविड नियंत्रणासाठी तपासण्यावर विशेष भर देत असल्याचे सांगण्यात आले. कोविड रुग्णांच्या संपर्कात आलेल्या व्यक्तींचा शोध घेवून त्यांच्या तपासण्या करून आवश्यक औषोधोपचार केला जात आहे. तसेच, प्रत्येक प्राथमिक आरोग्य केंद्रात विशेष कोविड केअर सेंटर सुरू करण्यात आले आहे. गृह विलगीकरणातील रुग्णांसाठी विशेष प्रोटोकॉल तयार करण्यात आले आहेत. कोविड प्रतिबंधात्मक उपाययोजनेंतर्गत मास्क घालणे, सोशल डिस्टन्सिंग, तसेच वारंवार हात धुणे, या त्रिसुत्रीचा वापर करण्यासाठी प्रत्येक गावनिहाय विशेष चमू तयार करण्यात आले आहेत. त्यानुसार प्रभावी उपाययोजना लागू करण्यात आल्या असल्याची माहिती जिल्हाधिकारी ठाकरे यांनी दिली.