मुख्यमंत्री एकनाथ शिंदेंनी अपघातग्रस्त दुचाकीस्वाराचे वाचवले प्राण
नागपूर CM Eknath Shinde :मुंबईहून नागपुरला परतल्यानंतर मुख्यमंत्री एकनाथ शिंदे यांनी बाजार गावातील सोलर अर्नामेंट्स कंपनीला भेट देऊन पाहणी केली. या घटनेचा आढावा घेऊन पुन्हा नागपुरकडं परतत असताना गोंडखैरीच्या बस स्थानकाजवळ एक अपघात झाल्याचं त्यांना समजलं. याठिकाणी झालेल्या भीषण अपघातात एका ट्रक आणि दुचाकीची धडक होऊन ट्रक हा बोनेटमध्ये जाऊन अडकला होता. त्याचवेळी त्या ट्रकला एक कारही येऊन धडकली. या अपघातानंतर कारमधील काही प्रवासी जखमी झाले.
अपघात झाल्याचं कळताच त्याठिकाणी बघ्यांची गर्दी जमली. ही परिस्थिती पाहून मुख्यमंत्र्यांनी आपला ताफा तिथं थांबवायची सूचना केली. त्यानंतर ते स्वतः खाली उतरले. त्या ठिकाणी उभे राहून त्यांनी त्या तरुणाला प्रयत्नपूर्वक ट्रकखालून बाहेर काढायला लावले. तरुण गंभीर जखमी असल्यानं मुख्यमंत्र्यांनी तात्काळ त्याला आपल्या ताफ्यातील रुग्णवाहिका दिली. ते स्वतः त्याला नागपुरातील रवी नगर चौकातील सेनगुप्ता रुग्णालयात घेऊन आले. दरम्यान, या तरुणावर उपचार सुरू असून त्याची प्रकृती आता स्थिर आहे.