Tajbagh Trust Embezzlement Case : ताजबाग ट्रस्ट घोटाळ्या प्रकरणी काँग्रेस नेते शेख हुसेनला अटक, दीड कोटींचा घोटाळ्याचा आरोप

पंतप्रधान नरेंद्र मोदी यांच्या संदर्भात आक्षेपार्ह भाषा वापरल्यानंतर चर्चेत आलेले काँग्रेस नेते शेख हुसेन यांना ताजबाग ट्रस्टमध्ये घोटाळा केल्याप्रकरणी अटक करण्यात आली आहे. शेख हुसेन यांच्याविरोधात गेल्या वर्षी गुन्हा दाखल करण्यात आला होता. सखोल चौकशी केल्यानंतर पोलिसांनी त्यांना अटक केली आहे. शेख हुसेन नागपूर शहर काँग्रेसचे माजी शहराध्यक्ष आहेत.

नागपूर :नागपुरच्या हजरत बाबा ताजुद्दीन ट्रस्टचे माजी अध्यक्ष व काँग्रेसचे माजी शहराध्यक्ष शेख हुसेन यांच्यासह दोघांना एक कोटी 59 लाख रुपयांच्या घोटाळा प्रकरणात अटक करण्यात आली आहे. ट्रस्टचे विद्यमान सचिव ताज अहमद अली यांच्या तक्रारीवरून सक्करदारा पोलिसांनी गेल्या वर्षी सप्टेंबर महिन्यात फसवणुकीचा गुन्हा दाखल केला होता. या कारवाईमुळे ताजबाग ट्रस्टचे संबंधित लोकांचे धाबे दणाणले आहे.

ट्रस्टचा निधी स्वतःच्या खात्यात वळवला :जानेवारी 2011 ते डिसेंबर 2016 या पाच वर्षांच्या कालावधीत काँग्रेस नेते शेख हुसेन हे ट्रस्टचे अध्यक्ष तर इकबाल वेलजी सचिव होते. ट्रस्टला भाविक आणि विविध स्त्रोतांकडून जे उत्पन्न मिळाले, त्यापैकी हुसेन यांनी एक कोटी 48 लाख तर वेलजी याने अकरा लाख 52 हजार रुपये स्वतःच्या खात्यात जमा केल्याचा आरोप आहे. ही रक्कम जमा करण्यापूर्वी ट्रस्ट किंवा धर्मदाय आयुक्तांची कुठलीही परवानगी घेण्यात आली नाही.

10 मे पर्यंत पोलीस कोठडी :ताजबाग ट्रस्टमध्ये नवीन पदाधिकाऱ्यांच्या नियुक्तीपासूनच हे प्रकरण तापले होते. याबाबत पोलिसात तक्रार करण्यात आली होती. चौकशीनंतर शेख हुसेन यांच्यासह दोघांना अटक करण्यात आली आहे. या दोघांनाही 10 मे पर्यंत पोलीस कोठडी सुनावण्यात आली आहे.

पंतप्रधान नरेंद्र मोदीवर केली होती जहरी टीका :गेल्या वर्षी जून महिन्यात काँग्रेस तर्फे नागपूर शहरात काँग्रेस नेते राहुल गांधी यांच्यावर केंद्रीय तपास यंत्रणेद्वारे करण्यात आलेल्या कारवाई विरोधात आंदोलन करण्यात आले होते. या आंदोलनाच्या वेळी शेख हुसेन यांनी पंतप्रधान नरेंद्र मोदी यांच्यावर जहरी टीका केली होती. त्यानंतर भाजपच्या वतीने शेख हुसेन यांच्याविरुद्ध पोलीस स्टेशन मध्ये तक्रार दाखल करून यांच्यावर कारवाईची मागणी करण्यात आली होती. त्यानंतर आता या दहा वर्षे जुन्या प्रकरणात शेख हुसेन यांच्यावर कारवाई करून अटक करण्यात आली आहे हे विशेष.