दृष्टी गमावलेल्या कुटुंबीयांची परवड; न्याय न मिळाल्यास आंदोलनाचा इशारा

जोगेश्वरीच्या ट्रॉमा केअर सेंटर रुग्णालयात मोतिबिंदू शस्त्रक्रिया केल्यानंतर ज्या रुग्णांची दृष्टी कायमची गेली, त्या  रुग्णांसह त्यांच्या कुटुंबीयांच्या जीवनात अंधार पसरला आहे. दृष्टी गमावलेल्यांमध्ये दोघेजण चालक होते, त्यांची रोजीरोटी गेली.

मुंबई - जोगेश्वरीच्या ट्रॉमा केअर सेंटर रुग्णालयात मोतिबिंदू शस्त्रक्रिया केल्यानंतर ज्या रुग्णांची दृष्टी कायमची गेली, त्या रुग्णांसह त्यांच्या कुटुंबीयांच्या जीवनात अंधार पसरला आहे. दृष्टी गमावलेल्यांमध्ये दोघेजण चालक होते, त्यांची रोजीरोटी गेली. रुग्णालयाच्या चकरा मारणाऱ्या कुटुंबातील सदस्यांनाही नोकरीवरुन काढण्यात आले. रुग्णांच्या नातेवाईकांनी यासंदर्भात पोलिसांत तक्रार दाखल केली आहे. न्याय मिळाला नाही, तर एकत्र येऊन आंदोलन करण्याचा इशारा नातेवाईकांना दिला आहे.

मोतीबिंदूची शस्त्रक्रिया झाल्यानंतर गौतम गवाणे (४४) यांची दृष्टी गेली. शस्त्रक्रियेनंतर ट्रॉमा केअर सेंटरमधून त्यांना केईमला दाखल करण्यात आले. डोळा काढून टाकला नाही, तर संसर्ग वाढत जाईल, असे त्यांना सांगण्यात आले. केईम रुग्णालयातून घरी गेल्यानंतर दुसऱ्याच दिवशी त्यांचा तोल जाऊ लागला. डॉक्टर संसर्ग मेंदूपर्यंत, शरीरात सर्वत्र पसरल्याचे सांगत आहेत. गेले २ महिने पतीच्या उपचारासाठी वेळ दिल्यामुळे गौतम यांच्या पत्नी कविता यांना कामावरून कमी करण्यात आले. यामुळे २ मुलांच्या शिक्षणाचा खर्च, नवऱ्याच्या रिक्षासाठी घेतलेले कर्ज फेडायचे कसे, असा प्रश्न कविता यांच्या समोर उभा राहिला आहे. त्यात औषधांचा खर्च कसा झेलणार याने त्या चिंताग्रस्त झाल्या.

मोतीबिंदूची शस्त्रक्रिया झाल्यानंतर डोळ्यातला संसर्ग वाढलेल्या ७५ वर्षीय फातिमा शेख ट्रॉमा केअरमध्ये पडल्या. यात त्यांचे कंबरेचे हाड मोडले. केईएममध्ये उपचारासाठी आणल्यानंतरही दिसत नसल्याने त्या पुन्हा तोल जाऊन पडल्या. त्यांना हाडांच्या शस्त्रक्रियेसाठी दुसऱ्या विभागात हलवण्यात आले आहे. या सर्व २ महिन्यांच्या कालावधीत दोनच दिवस त्यांना कामाला जाता आले. यामुळे आर्थिक चणचण निर्माण झाली असून घर कसे चालवायचे, असा प्रश्न फातिमा यांचा मुलगा रफिक याला पडला आहे.

आरे कॉलनीत राहणाऱ्या ४७ वर्षीय सीता सिंग यांची मोतीबिंदू शस्त्रक्रिया ४ जानेवारीला झाली. पट्टी काढल्यानंतर डोळ्यातील संसर्ग पाहून पुन्हा शस्त्रक्रिया करण्यात आली. ती ५ तास सुरू होती. त्यानंतर त्यांना केईएम रुग्णालयामध्ये हलवण्यात आले. तेथे त्यांच्यावर तिसरी शस्त्रक्रिया झाली. डोळ्यांना धूसर दिसू लागले असले तरी सीता या मानसिक धक्क्यातून अद्याप सावरल्या नाही. ७५ वर्षीय बेलूदेवी यांच्यावर केईम रुग्णालयात उपचार करून घरी सोडण्यात आले. मात्र, रुग्णालयातील प्रसंगांने त्या नकार देत असल्याचे सून शारदा खडका म्हणाल्या.