नागपूर - जिल्हा नियोजन समितीच्या बैठकी बाहेर आज आगळे-वेगळे चित्र पाहायला मिळाले. अर्थमंत्री अजित पवार यांनी नागपूर जिल्ह्याच्या विकास निधीला मोठ्या प्रमाणात कात्री लावल्याचा आरोप करत भारतीय जनता पक्षाच्या नागपूर शहर आणि जिल्ह्यातील आमदारांनी बैठकीवर बहिष्कार टाकत आंदोलन केले. तर त्याच ठिकाणी राष्ट्रवादी काँग्रेसचे माजी आमदार प्रकाश गजभिये यांनी देखील केंद्राने जीएसटीचा २८०० कोटी रुपयांचा परतावा लगेच द्यावा, या मागणी याकरिता आंदोलन करत घोषणाबाजी केली. त्यामुळे राष्ट्रवादी काँग्रेसचे नेते भाजपला डिवचण्याचा प्रयत्न करत असल्याचे दिसून आले. महत्वाचे म्हणजे प्रकाश गजभिये यांना विधिमंडळात नाविन्यपूर्ण आंदोलन करण्यासाठी ओळखले जाते.
माजी आमदार प्रकाश गजभिये बोलताना...
आम्ही केंद्रातील विरोधक
पेट्रोल-डिझेल आणि घरगुती गॅस यांच्या वाढलेल्या किंमतीवरून राज्याचे राजकारण तापलेले आहे. राज्य सरकारने इंधनावरील कर कमी करून जनतेला दिलासा द्यावा, अशी मागणी राज्यातील विरोधी पक्षाकडून केली जात आहे. तर केंद्राने आपला कर कमी करून इंधनाचे दर आटोक्यात आणावे, अशी मागणी राज्यातील सत्ताधारी करत आहेत. या संदर्भात प्रकाश गजभिये म्हणाले की, 'आम्ही राज्यात जरी सत्तेत असलो तरी केंद्रात मात्र विरोधक आहोत. त्यामुळे केंद्राने आमचा जीएसटीचा परतावा द्यावा आणि इंधनाचे दर कमी करण्यासाठी पावलं उचलावे या मागणीसाठी आंदोलन करत आहे.'