नागपूर- नागपूर-भंडारा मार्गावरील कळमना ते पारडी या परिसरात गेल्या सात वर्षांपासून निर्माणाधीन असलेल्या उड्डाणपुलाचा काही भाग मंगळवारी (दि. 19) रात्री कोसळला. घटनेच्या वेळी त्या भागात काम बंद होते. त्यामुळे सुदैवाने कोणतीही जीवित हानी झाली नाही. यानंतर राष्ट्रीय महामार्ग प्राधिकरणाने चौकशी समिती गठीत करण्याची घोषणा केली आहे. या शिवाय व्हिएनआय इन्स्टिट्यूटलाही अपघाताचे तांत्रिक कारण शोधण्यासाठी पत्र दिले असल्याची माहिती 'एनएचएआय'चे (राष्ट्रीय महामार्ग प्राधिकरण) क्षेत्रीय अधिकारी राजीव अग्रवाल यांनी दिली आहे.
2014 सली प्रधानमंत्री नरेंद्र मोदी यांच्या हस्ते पारडी ते कळमना या उड्डाण पुलाच्या कामाचे भूमिपूजन करण्यात आले होते. सात वर्षात या पुलाचे निर्माणकार्य केवळ 60 टक्केच होऊ शकलेले आहे. नागपूर शहरातील सर्वाधिक व्यस्त परिसर म्हणून या भागाला ओळखले जाते. तरीही अतिशय संथ गतीने त्या पुलाचे निर्माणकार्य सुरू आहे यापूर्वीही या भागात अनेक अपघात होऊन काहींना आपला जीव गमवावा लागला.