नागपूर : कोरोनाच्या काळात वैद्यकीय क्षेत्रातील डॉक्टरांना हातभार म्हणून आरोग्य विभागात काम करणाऱ्यांनी सेवेत रुजू व्हा, असे आवाहन राज्य शासनाने केले होते. यात बीएससी नर्सिंगच्या विद्यार्थ्यांना संधी देण्यात आली. त्यांना सर्व सोयीसुविधा व निर्वाह भत्ता देऊ, असेही सांगितले. मात्र, त्या सुविधा प्रत्यक्ष मिळत नसल्याचे सांगत, नागपुरात अखिल भारतीय विद्यार्थी परिषदेकडून आंदोलन करण्यात आले. नर्सिंगच्या विद्यार्थ्यांना निर्वाह भत्ता द्या, अशी मागणीही यावेळी करण्यात आली. शासकीय वैद्यकीय महाविद्यालय व रुग्णालय परिसरात हे आंदोलन करण्यात आले.
कोरोनाच्या संकटाशी लढण्यासाठी आरोग्य यंत्रणा दिवसरात्र झटत आहे. याच यंत्रणेत असणाऱ्या बीएससी नर्सिंगच्या विद्यार्थ्यांना अद्याप प्रशासनाकडून कोणतीही मदत मिळालेली नाही. त्या पार्श्वभूमीवर अखिल भारतीय विद्यार्थी परिषदेकडून आंदोलन करण्यात आले. नागपुरातील शासकीय वैद्यकीय रुग्णालय व महाविद्यालय परिसरात हे आंदोलन करण्यात आले. नर्सिंगच्या विद्यार्थ्यांना निर्वाह भत्ता, मोफत भोजन व्यवस्था यासह इतर सुविधा द्या, अशी मागणीही यावेळी करण्यात आली. शिवाय या विद्यार्थ्यांना सेवेत रुजू करण्याचे आदेश जिल्हाधिकाऱ्यांनी दिले होते. तरीही नर्सिंगच्या विद्यार्थ्यांकडे दुर्लक्ष का, असा सवालही यावेळी उपस्थित करण्यात आला.