राज्यपाल नियुक्त आमदारकीबाबत कोश्यारी काय निर्णय घेणार? उत्सुकता शिगेला

राज्यपाल नियुक्त आमदारांबाबत महाविकास आघाडीकडून दिलेल्या नावांवर राज्यपाल शिक्कामोर्तब करणार की, आक्षेप घेणार याकडे सर्वांचे लक्ष लागले आहे.

मुंबई -राज्यपाल नियुक्त १२ आमदारांबाबत काय निर्णय होणार, याची उत्सुकता शिगेला पोहोचली आहे. महाविकास आघाडीतील तिन्ही पक्षांनी प्रत्येकी चार नावे राज्यपालांच्या मंजुरीसाठी दिलेली आहेत. आलेल्या सर्व नावांची पडताळणी करण्यासाठी राज्यपालांनी वेळ घेतला आहे. महाविकास आघाडीकडून जी नावे दिलेली आहेत, त्यावर राज्यपाल शिक्कामोर्तब करणार की, आक्षेप घेणार याकडे सर्वांचे लक्ष लागले आहे.

मंत्रिमंडळ बैठकीत ठराव

राज्यपाल नियुक्त सदस्यांची निवड करताना साहित्य, कला, संशोधन, विज्ञान, समाजसेवा आणि सहकार आदी क्षेत्रातील योगदान लक्षात घेतले जाते. मात्र, सत्ताधारी पक्षाकडून अनेकदा त्यांच्या पक्षातील अथवा जवळच्या मंडळींची वर्णी लावली जाते. मात्र, यावेळी राज्यपालांनी महाविकास आघाडीला रोखून धरण्यासाठी १२ सदस्यांच्या नियुक्तीचा विषय मागे टाकला होता. त्यामुळेच, महाविकास आघाडी सरकारकडून यासाठी शेवटी मंत्रिमंडळाच्या बैठकीत ठराव घेऊन त्यासाठीचा प्रस्ताव मंजूर करून तो राज्यपालांना सादर करावा लागला होता.

ही आहेत संभाव्य नावे-

शिवसेनेकडून कला क्षेत्रातून उर्मिला मातोंडकर आणि नितीन बानगुडे पाटील, समाजसेवा क्षेत्रातून विजय करंजकर, तर सहकार क्षेत्रातून चंद्रकांत रघुवंशी यांचे नाव देण्यात आले आहे. काँग्रेसकडून देण्यात आलेली बहुतांश नावे ही राजकीय, सहकार, समाजसेवा क्षेत्रातील आहेत. यात प्रामुख्याने सचिन सावंत, रजनी पाटील, मुजफ्फर हुसैन आणि कला क्षेत्रातील अनिरुद्ध वनकर यांच्या नावाचा समावेश आहे. राष्ट्रवादीकडून समाजसेवा, सहकारसाठी एकनाथ खडसे, राजू शेट्टी यांची नावे देण्यात आली आहे. तर, साहित्य क्षेत्रातील यशपाल भिंगे आणि कला क्षेत्रासाठी आनंद शिंदे यांचे नाव देण्यात आले आहे.