मुंबई - तरुणांनी जास्तीत जास्त मतदान करावे, यासाठी मुंबई सेंट्रल स्थानकासमोरील रिओ हेअर स्टायलिश या सलूनने ग्राहकांना ५० टक्के सवलत देऊ केली आहे. ही सवलत त्यांनी ८ दिवस दिली आहे. मतदान करुन शाई लावलेले बोट दाखवा आणि ५० टक्के सवलतीच्या दरात केस कापा, असे आवाहन त्यांनी मतदारांना केले आहे.
तरुणांनी जास्तीत जास्त मतदान करावे म्हणून हे अभियान रिझवान शेख व त्यांची मुलगी मारिया शेख यांनी चालवले आहे. मतदान करणाऱ्या तरुणांना कटिंग, बॉडी मसाज याबरोबरच सलूनमधील सर्व सवलती निम्म्या किमतीत मिळणार आहेत. हे सलून महिला व पुरुष दोघांसाठीही आहे.
मतदानादिवशी सलूनमध्ये गर्दी झाल्यास अपॉइंटमेंटचीही सोय त्यांनी केली आहे. त्याचा प्रचार सोशल मीडियाच्या माध्यमातून ते करत आहेत. या संधीचा फायदा सर्व मतदारांना केवळ २९ एप्रिल रोजी होणार्‍या मतदानादिवशीच घेता येणार नाही, तर संपूर्ण आठवडाभर होणार आहे. एका आठवड्याच्या कमी कमाईमुळे जर परिवर्तन होणार असेल, मतदान जनजागृती होणार असेल तर इतर दुकानदारही या अभियानात सहभागी होतील, असा विश्वास रिझवान शेख यांनी व्यक्त केला.