लसीकरणाची क्षमता दररोज 50 हजारांवर नेणार- सुरेश काकाणी

मुंबई महापालिका दरदिवशी 10 हजार लसी देणार आहे. त्यात वाढ करून ही क्षमता दररोज 50 हजार लसी देण्यापर्यंत वाढवली जाईल. तसेच आरोग्य कर्मचाऱ्यांना एक लस देण्यासाठी 15 दिवस लागणार होते. मात्र एका आठवड्यात हे लसीकरण पूर्ण करू, अशी माहिती पालिकेचे अतिरिक्त आयुक्त सुरेश काकाणी यांनी दिली.

मुंबई - मुंबई महापालिका प्रशासन आणि आरोग्य विभाग यांनी कोरोनाचा प्रसार आटोक्यात आणण्यासाठी कंबर कसली. लवकरच कोरोनावर लस उपलब्ध होणार आहे. पालिका दरदिवशी 10 हजार लसी देणार आहे. त्यात वाढ करून ही क्षमता दररोज 50 हजार लसी देण्यापर्यंत वाढवली जाईल. तसेच आरोग्य कर्मचाऱ्यांना एक लस देण्यासाठी 15 दिवस लागणार होते. मात्र एका आठवड्यात हे लसीकरण पूर्ण करू, अशी माहिती पालिकेचे अतिरिक्त आयुक्त सुरेश काकाणी यांनी दिली.

जंबो सेंटरमध्येही लसीकरण
मुंबईत कोरोनाचा फैलैव वाढल्यानंतर रुग्णांवर उपचार करण्यासाठी महापालिकेने बीकेसी (वांद्रे), नेस्को (गोरेगाव), एनएससीआय (वरळी), महालक्ष्मी, दहिसर, मुलुंड अशा ठिकाणी जम्बो कोविड सेंटर उभारली होती. तेथे आता रुग्णसंख्या कमी असल्याने या जम्बो कोविड सेंटरचा उपयोग लसीकरणासाठी करण्यात येणार आहे. मात्र बाधित रुग्ण आणि लसीकरणासाठी आलेले नागरिक यांचा संबंध येणार नाही याची दक्षता घेण्यात येणार आहे. दोन्ही विभागासाठी स्वतंत्र मार्ग असतील असेही अतिरिक्त आयुक्त सुरेश काकाणी यांनी सांगितले.

आरोग्य कर्मचाऱ्यांचे लसीकरण एका आठवड्यात
आटोक्यात येणारा कोरोना, लवकरच उपलब्ध होणारी लस आणि लसीकरण या पार्श्वभूमीवर पहिल्या टप्प्यात सुमारे सव्वा लाख आरोग्य कर्मचाऱ्यांना लस दिली जाणार आहे. आरोग्य कर्मचाऱ्यांना 15 दिवसात लस देण्याचे नियोजन करण्यात आले आहे. मात्र आरोग्य कर्मचाऱ्यांना एका आठवड्यात देऊन लसीकरणाचा पहिला टप्पा पूर्ण केला जाईल, असेही काकाणी म्हणाले.

लसिकरणाचे उद्दिष्ट वाढवणार
लसीकरणासाठी आठ केंद्रे नियुक्त करण्यात आली होती. त्यापैकी केईएम, नायर, कूपर आणि सायन रुग्णालयात दररोज दोन हजार लोकांना लस देण्याचे नियोजन होते. तर वांद्र्याचे भाभा रुग्णालय, सांताक्रूझचे व्ही. एन. देसाई हॉस्पिटल, घाटकोपरचे राजावाडी हॉस्पिटल आणि कांदिवलीचे भारतरत्न डॉ. बाबासाहेब आंबेडकर हॉस्पिटल या उर्वरित चार केंद्रात दररोज प्रत्येकी एक हजार लोकांना लस देण्याचे नियोजन होते. त्यामुळे दररोज 10 हजार ते 12 हजार व्यक्तींना लसीकरण करण्यात येण्याची शक्यता होती. मात्र आता दररोज 50 हजारांचे उद्दिष्ट ठेवण्यात आले आहे. त्यासाठी जम्बो कोविड सेंटरचा उपयोग करण्यात येणार आहे. लसीकरणासाठी पालिकेच्या प्रत्येक विभागात दोन याप्रमाणे 50 केंद्रांचे उद्दिष्ट होते. त्यात वाढ करत आता 100 केंद्रांचे उद्दिष्ट ठेवण्यात आले आहे.

लस येताच 24 तासात लसीकरण सुरू
पहिल्या टप्प्यातील लसीकरण 12 ते 15 दिवसांत पूर्ण व्हावे, यासाठी महापालिकेने योजना आखली आहे. त्यासाठी 2245 पॅरामेडिकल स्टाफचे एकूण 500 पथक तैनात आहेत. सर्व कर्मचाऱ्यांचे लसीकरणाचे प्रशिक्षण देखील पूर्ण झाले आहे. लस उपलब्ध होताच, अवघ्या 24 तासांच्या पूर्वसूचनेने प्रत्यक्ष लसीकरण सुरु केले येईल, अशी माहिती पालिका अतिरिक्त आयुक्त सुरेश काकाणी यांनी दिली.

हेही वाचा -अपघाताचा थरार! मोटारीची दुचाकीला धडक, पाहा घटनेचा लाईव्ह व्हिडीओ