मुंबई : एकनाथ शिंदे यांना हाताशी धरुन भाजपाने राज्यातील राजकारणात मोठा भूकंप घडवून आणला. राज्यातील महाविकास आघाडीची सत्ता उलथवून टाकली आणि राज्यातील कधी काळी मित्र पक्ष असलेल्या शिवसेना पक्षात मोठे खिंडार देखील पाडले. एकनाथ शिंदे यांच्यासोबत 39 आमदारांनी शिवसेना पक्ष सोडला यामुळे महाविकास आघाडी सरकार कोसळणार होते, हे सर्वांना माहिती होते. परंतु कर्नाटक राज्यातील उदाहरण समोर ठेवून उद्धव ठाकरे यांनी शेवटपर्यंत लढा दिला पाहिजे होता. त्यांच्या राजीनाम्यामुळे शिंदे आणि फडणवीस यांचा डाव यशस्वी ठरला आणि राज्यात शिंदे-फडणवीसचे सरकार आले.
लगेच दिला राजीनामा : दरम्यान, काँग्रेस आणि कुमारस्वामी यांचे सरकार कोसळले. तेव्हा सरकार अल्पमतात गेल्यानंतरही कुमारस्वामी बहुमत चाचणीला सामोरे गेले. त्याच जागेवर उद्धव ठाकरे यांनी परिस्थिती हाताबाहेर गेल्याचे दिसताच मुख्यमंत्री पदाचा राजीनामा दिला. फेसबुक लाईव्ह करत राजीनामा देण्याऐवजी जर विधानसभेत सविस्तर भाषण केले असते तर कदाचित याचा परिणाम वेगळा राहिला असता.
राजकीय नेत्यांना नाही आवडला उद्धव ठाकरे यांचा निर्णय : विशेष म्हणजे उद्धव ठाकरे यांनी राजीनामा दिल्यावरुन अनेक नेत्यांनी देखील नाराजी व्यक्त केली होती. काँग्रेस पक्षाचे नेते आणि माजी मुख्यमंत्री पृथ्वीराज चव्हाण यांनी सर्वात आधी उद्धव ठाकरे यांच्या राजीनाम्याविषयी नाराजी बोलून दाखवली होती. पक्षांतरबंदी कायद्यानुसार उद्धव ठाकरे यांच्याकडे एकनाथ शिंदे आणि इतर आमदारांवर कारवाई करण्याची मोठी संधी होती. कारण शिंदे गटाचे नेते आम्ही पक्षात आहोत, असे म्हणत होते. त्यावेळी पक्ष फुटलेला नव्हता ते पक्षातच होते, परंतु उद्धव ठाकरे यांनी गडबडीने राजीनामा दिला, असे पृथ्वीराज चव्हाण म्हणाले होते. विरोधी पक्षनेते अजित पवार आणि राष्ट्रवादी काँग्रेसचे अध्यक्ष शरद पवार यांनीही उद्धव ठाकरे यांचा राजीनामा देण्याचा निर्णय चुकीचा म्हटले आहे.
भावनिक होऊन दिला राजीनामा : उद्धव ठाकरेंनी राजीनामा दिला होता त्यादिवशी सायंकाळपर्यंत बहुमत चाचणी करता आली असती. परंतु त्यांनी त्याआधीच राजीनामा दिला. उद्धव ठाकरे यांनी राजीनामा दिला त्यावेळी ते म्हणाले की, मला आपलीच माणसे आपल्याविरोधात मत देत आहेत, हे बघायचे नाही. त्याचबरोबर अजून काही कारणे आहेत, ते जाणून घेऊ. बहुमत चाचणीत जर महाविकास आघाडी या सरकारच्याविरोधात मतदान झाले असते तर सरकार अल्पमतात असल्याचे जाहीर झाले असते. तसेच भाजपाकडून त्यांची खिल्ली उडवली गेली असते. भाजप नेत्यांसमोर मुख्यमंत्र्यांना राजीनामा देत असल्याचे जाहीर करावे लागले असते. या गोष्टी घडून नयेत म्हणून उद्धव ठाकरेंनी आधीच राजीनामा दिला.