राज्यात कोरोनाबाधित पोलिसांच्या संख्येत पुन्हा वाढ; 1 हजार 206 पोलिसांना कोरोनाची लागण

लॉकडाऊनची अंमलबजावणी व्हावी यासाठी पोलीस दल दिवस-रात्र काम करत आहे. या दरम्यान पोलिसांना कोरोनाने विळखा घातला असून हे प्रमाण दिवसेंदिवस वाढतच आहे. राज्यात 1 हजार 206 पोलिसांना कोरोनाची बाधा झाल्याची धक्कादायक बाब समोर आली आहे.

मुंबई - कोरोना संक्रमण थांबवण्यासाठी देशभरात लॉकडाऊन करण्यात आले. लॉकडाऊनची अंमलबजावणी व्हावी यासाठी पोलीस दल दिवस-रात्र काम करत आहे. या दरम्यान पोलिसांना कोरोनाने विळखा घातला असून हे प्रमाण दिवसेंदिवस वाढतच आहे. राज्यात 1 हजार 206 पोलिसांना कोरोनाची बाधा झाल्याची धक्कादायक बाब समोर आली आहे. यात 125 पोलीस अधिकारी आणि 1 हजार 89 पोलीस कर्मचाऱ्यांचा समावेश आहे.

आत्तापर्यंत राज्यातील विविध ठिकाणी उपचार घेत असलेले 283 पोलीस कोरोनातून बरे झाले असून यात 34 पोलीस अधिकारी व 249 पोलीस कर्मचारी आहेत. अजूनही 912 पोलिसांवर उपचार सुरू असून यात 90 पोलीस अधिकारी व 822 पोलीस कर्मचारी आहेत.

लॉकडाऊन काळात राज्यात कलम 188 नुसार तब्बल 1 लाख 9 हजार 394 गुन्हे नोंदवण्यात आले आहेत. 676 जणांवर क्वारंटाईन मोडल्या प्रकरणी कारवाई करण्यात आली आहे. पोलिसांवर हल्ला होण्याच्या 236 घटनाही घडल्या असून या प्रकरणी आत्तापर्यँत पोलिसांनी 812 जणांना अटक केली आहे.

कोव्हिड 19 च्या संदर्भात 100 क्रमांकाच्या नियंत्रण कक्षावर तब्बल 93 हजार 91 कॉल आले आहेत. अवैध वाहतुकीच्या 1 हजार 310 प्रकरणात 58 हजार 764 वाहने जप्त करण्यात आली आहेत. कोविड-19 वर उपचार करणाऱ्या डॉक्टर, नर्स व आरोग्य कर्मचाऱयांवर 38 ठिकाणी हल्ले झाले आहेत.