मुंबई -कोरोनाच्या पार्श्वभूमीवर महाराष्ट्र लोकसेवा आयोगाची (एमपीएससी) परीक्षा पुढे ढकलण्यात आली होती. मात्र, ही परीक्षा ४ सप्टेंबर २०२१ रोजी घेण्याात येणार आहे. त्यामुळे मुंबई उपनगरातील विद्यार्थ्यांना परीक्षा केंद्रावर पोहचण्यासाठी लोकल प्रवासाची परवानगी मिळावी, अशी मागणी विद्यार्थ्यांनी भाजपाचे नेते आशिष शेलार यांच्याकडे केली होती. आशिष शेलार यांनी तत्काळ ही बाब रेल्वे राज्यमंत्री रावसाहेब दानवे आणि राज्याचे मुख्य सचिव सिताराम कुंटे यांच्या निदर्शनास आणून दिली. या मागणीला रेल्वे राज्यमंत्री आणि मुख्य सचिवांकडून सकारात्मक प्रतिसाद मिळाल्याची माहिती आशिष शेलार यांनी ट्विटद्व्रारे दिली आहे. तसेच यासाठी राज्य शासनाने रेल्वे प्रशासनाशी संपर्क करून विद्यार्थ्यांना दिलासा द्यावा, अशी मागणीही त्यांनी केली आहे.
राज्य सरकारचा प्रस्ताव हवा -
कोरोनाच्या पार्श्वभूमीवर राज्य सरकारच्या सुचनेनुसार अत्यावश्यक सेवेतील कर्मचारी आणि कोरोना प्रतिबंधक लसीचा डोस घेतलेल्या नागरिकांना लोकल प्रवासाची मुभा आहे. मात्र, एमपीएससीची परीक्षा
४ सप्टेंबर २०२१ रोजी होणार आहे. यामुळे मुंबई आणि उपनगरातील विद्यार्थ्यांना परीक्षा केंद्रावर वेळेत पोहचण्यासाठी लोकल प्रवासाची मुभा देण्याची विनंती विद्यार्थ्यांनी भाजपाचे आमदार आशिष शेलार यांच्याकडे केली होती. त्यानुसार त्यांनी तातडीने रेल्वे राज्यमंत्री रावसाहेब दानवे यांच्याशी संपर्क केला. मात्र यासाठी राज्य सरकारचा प्रस्ताव आवश्यक असल्याचे त्यांनी सांगितले. तसेच परिक्षेचे प्रवेशपत्र दाखवून विद्यार्थ्यांना रेल्वेचे तिकीट देता येईल, असा पर्यायही त्यांनी सुचवला. त्यानंतर आशिष शेलार यांनी याची माहिती राज्याचे मुख्य सचिवांना दिली. त्यांनीही याबाबत सकारात्मक प्रतिसाद दिल्याचे आशिष शेलार यांनी म्हटले. त्यामुळे या विद्यार्थ्यांना दिलासा मिळण्याची शक्यता आहे.
हेही वाचा -मराठा आरक्षणप्रश्नी छत्रपती खासदार संभाजीराजेंनी घेतली राष्ट्रपतींची भेट, सर्व पक्षांचे प्रतिनिधी होते उपस्थित
