26/11 हल्ल्यातील दहशतवाद्यांकडे होती हिंदू ओळखपत्रे!

माजी पोलीस आयुक्त राकेश मारिया यांनी निवृत्तीनंतर लिहलेल्या 'लेट मी से ईट नाऊ' या पुस्तकात अनेक खळबळजनक खुलासे केले आहेत. 26/11 च्या हल्ल्यातील दहशतवाद्यांकडे हिंदू व्यक्तींची ओळखपत्रे आढळून आली होती, असा खुलासा राकेश मारिया यांनी केला आहे.

मुंबई - माजी पोलीस आयुक्त राकेश मारिया यांनी निवृत्तीनंतर लिहलेल्या 'लेट मी से ईट नाऊ' या पुस्तकात अनेक खळबळजनक खुलासे केले आहेत. मुंबईतील 26/11 च्या हल्ल्याबाबत जिवंत पकडलेला अतिरेकी अजमल कसाबबद्दलही मारिया यांनी मोठा या पुस्तकात केला आहे.

अजमल कसाब ज्या वेळी मुंबईत हल्ल्यासाठी दाखल झाला होता, त्यावेळी त्याच्याकडे हिंदू व्यक्तीचे ओळखपत्र आढळून आले होते. 'समीर चौधरी' नावाचे ओळखपत्र कसाबने स्वत:कडे ठेवले होते. अजमल कसाब पकडला गेल्यानंतर आयएसआय आणि लष्कर ए तोयबा या संघटनांकडून अजमल कसाब याचा काटा काढण्याचा कट रचला गेला होता. मुंबईवर हल्ला करणाऱ्या सर्वच 10 दहशतवाद्यांकडे हिंदू नाव असलेले ओळखपत्र आढळून आले होते. हा हल्ला हिंदू दहशतवाद्यांनी केला असल्याचे भासवण्यासाठी ही ओळखपत्रे त्यांच्याकडे देण्यात आल्याचे, राकेश मारिया यांनी त्यांच्या पुस्तकात लिहले आहे. जर अजमल कसाब हा जिवंत पकडला गेला नसता, तर हा हल्ला हिंदू दहशतवाद्यांनी केला असल्याचा समज झाला असता.

हेही वाचा -शीना बोरा प्रकरणी राकेश मारियांचा देवेन भारतींवर खळबळजनक आरोप

26/11 च्या हल्ल्यातील 10 दहशतवाद्यांपैकी काही जणांना विद्यार्थी दाखवण्यात आले होते. एका ओळखपत्रात हैदराबादमधील एका महाविद्यालयाचाही उल्लेख करण्यात आला होता. अजमल कसाब याला पाकिस्तानातील त्याच्या नेत्यांनी सांगितले होते की, भारतात मुस्लिमांना नमाज पढू दिला जात नाही. येथील मशिदी बंद करण्यात आल्या आहेत. मात्र, त्याच्या समजुतीला चुकीचे ठरवण्यासाठी राकेश मारिया यांनी कसाबला कडक पोलीस सुरक्षेत एका मशिदीत नेले होते. भारतातील मुस्लिमांना कशा प्रकारे स्वातंत्र्यात नमाज पढू दिली जाते, हे दाखवून दिले होते, असेही या पुस्तकात सांगण्यात आले आहे.