मुंबई संस्कृती महोत्सवाच्या 32 व्या सोहळ्यात रसिकांना मिळणार संगीताची पर्वणी

Mumbai Culture Festival 2024 : मुंबई संस्कृती महोत्सवाची 32 वी आवृत्ती 13 आणि 14 जानेवारी 2024 रोजी पार पडणार आहे. यावेळी शास्त्रीय संगीत, भक्ती संगीत, लोकसंगीत आणि मंत्रमुग्ध करणाऱ्या लाईव्ह परफॉर्मन्सचा आनंद रसिकांना मिळणार आहे.

मुंबई - Mumbai Culture Festival 2024 : इंडियन हेरिटेज सोसायटीच्या वतीने प्रतिष्ठित मुंबई संस्कृती महोत्सवाची 32 वी आवृत्ती 13 आणि 14 जानेवारी 2024 रोजी पार पडणार आहे. हा सोहळा मुंबईतील फोर्टमध्ये आयकॉनिक टाऊन हॉल (एशियाटिक लायब्ररी) येथे होईल. दिग्गजांचा सहभाग असलेल्या या महोत्सवाची सुरुवात १३ जानेवारी (शनिवार) रोजी प्रसिद्ध बासरीवादक राकेश चौरसिया (बासरीवादक पंडित हरिप्रसाद चौरसिया यांचे पुतणे) यांच्या 'कन्फ्ल्यूएन्स - मयूझिक फॉर पीस अँड हार्मोनी'ने होईल. दुसर्‍या दिवशी म्हणजे १४ जानेवारी (रविवार) विदुषी अश्विनी भिडे देशपांडे (जयपूर-अत्रौली घराण्यातील हिंदुस्थानी शास्त्रीय संगीताचाच्या प्रवर्तक) आणि पंडित संजीव अभ्यंकर (मेवाती घराण्याचे हिंदुस्थानी शास्त्रीय संगीत गायक) यांच्या 'भक्ती संगम' या कार्यक्माचे आयोजन करण्यात आले आहे.

'मुंबई संस्कृती' या कार्यक्रमाचे मूळ 1992 मध्ये सापडते. इंडियन हेरिटेज सोसायटीची सुरुवात अनिता गरवारे यांच्या नेतृत्वात 1991 मध्ये झाली. आताचा ऐतिहासिक परिसर - बाणगंगा तलाव जतन करण्यासाठी, बाणगंगा महोत्सवाची सुरुवात झाली. "सर्व मुंबईकर नागरिकांनी बाणगंगा टँकबद्दल ऐकलेले असले तरी, फार कमी लोकांना त्याचे स्थान, इतिहास आणि महत्त्व माहित होते आणि त्यासाठी लाइव्ह म्युझिक हा जागरूकता वाढवण्याचा सर्वोत्तम मार्ग आहे, असे आम्हाला वाटले." , असे अनिता गरवारे म्हणाल्या. इंडियन हेरिटेज सोसायटीने बाणगंगा महोत्सव म्हणून सुरुवात केलेल्या या उत्सवाचे त्यातील स्थापत्य आणि सांस्कृतिक वारसा एकत्र करून व्यापक मान्यताप्राप्त अशा मुंबई संस्कृती महोत्सवात रुपांतर झाले आहे.

“शहरातील हेरिटेज लँडमार्क संरचनांचे पुनरुज्जीवन करण्यात ही सोसायटी महत्त्वाची भूमिका बजावते. संगीताच्या माध्यमातून मुंबईच्या इतिहासाची आणि संस्कृतीची सतत जाणीव वाढवण्यास आयएचएस वचनबद्ध आहे. ही हेरिटेज सोसायटी आपल्याला समृद्ध वारसा म्हणून मिळालेल्या गोष्टींबद्दल जागरुकता निर्माण करण्याचा प्रयत्न करते आणि त्याचे संवर्धन, जीर्णोद्धार आणि भविष्यातील पिढ्यांपर्यंत प्रसारित करण्यासाठी सक्रियपणे कार्य करते,” असेही अनिता गरवारे यांनी सांगितले.

आजच्या वेगवान जगात शास्त्रीय संगीताच्या कौतुकाची आव्हाने स्वीकारून, इंडियन हेरिटेज सोसायटीची टीम सक्रियपणे प्रेक्षक वर्गाचा विस्तार करण्यात गुंतलेली आहे. महाविद्यालये, संगीत शाळा आणि शैक्षणिक संस्थांपर्यंत पोहोचणे, सोशल मीडियाचा फायदा घेणे आणि मुंबई संस्कृती महोत्सवात मोफत प्रवेश देऊन अधिक समावेशक सांस्कृतिक अनुभव सुनिश्चित करणे अशा अनेक प्रयत्नांचा यात समावेश आहे.

प्रसिद्ध बासरीवादक राकेश चौरसिया भारतीय शास्त्रीय संगीताने आपल्या परफॉर्मन्सची सुरुवात करणार आहेत, नंतर फ्यूजन आणि लोकसंगीतासह इतर सांगीतिक घटकांचा समावेश असेल. याबद्दल बोलताना चौरासिया म्हणाले, “हे व्यासपीठ भारतीय शास्त्रीय संगीत, आमच्या सांस्कृतिक वारशाचा अविभाज्य भाग असलेल्या भारतीय शास्त्रीय संगीतावर प्रकाश टाकण्यासाठी एक आदर्श मंच आहे. संगीत प्रेमी प्रेक्षकांना ही पर्वणी त्यांनी उपलब्ध केली आहे. आमच्या वारशाची सांस्कृतिक समृद्धता शक्य तितक्या जास्त लोकांपर्यंत पोहोचवण्यास तयार आहे, याबद्दल मी इंडियन हेरिटेज सोसायटीच्या या प्रभावी उपक्रमाचे कौतुक करतो." राकेश चौरसिया यांना मृदंगमवर श्रीदार पार्थसारथी, तबल्यावर ओजस अधिया, तालवाद्यावर शिखर नाद कुरेशी, गिटारवर संजय दास आणि बासरीवर रितिक चौरसिया साथसंगत करणार आहेत.

विदुषी अश्विनी भिडे देशपांडे आणि पंडित संजीव अभ्यंकर यांचा ‘भक्ती संगम’ हा कार्यक्रम या दोन्ही कलाकारांच्या अनोख्या शैली, घराणे आणि ख्याल, भजन, स्तोत्र आणि स्तुती अशा विविध संगीत शैलींमध्ये अंतर्भूत असलेल्या भक्तीचा खरा संगम असणार आहे. या परफॉर्मन्सला तबल्यावर अजिंक्य जोशी, हार्मोनियमवर अभिनय रवंदे, बासरीवर अमर ओक, पखावाजवर ओंकार दळवी, साइड रिदमवर उद्धव कुंभार आणि अवंती पटेल सुत्रसंचालन करणार आहेत.

मुंबई संस्कृती महोत्सव हा प्रेक्षकांसाठी दिग्गजांच्या लाइव्ह परफॉर्मन्सचे साक्षीदार होण्याची अनोखी पर्वणी ठरणार आहे. मंत्रमुग्ध करणार्‍या संगीतासोबतच उदात्त कारणामुळे हा संगीत उत्सव वेगळा ठरतो. या महोत्सवाला उपस्थित राहण्याचे रसिक प्रेक्षकांना आवाहन आयोजकांनी केले आहे.

हेही वाचा -