ठाणे Thane Crime News : ठाण्याच्या कासारवडवली पोलीस ठाण्याच्या हद्दीत घडलेल्या घटनेमुळं ठाणे शहरात एकच खळबळ उडालीय. पोलिसांच्या माहितीनुसार आनंदनगर विहंग व्हॅली चौकात सतीश पाटील या व्यक्तीची गाडी येताच सोबत असेलला भूषण पाटील खाली उतरला. त्याचवेळी आरोपींनी बसल्या जागीच सतीश पाटील यांच्यावर वार करुन हत्या केली. त्यानंतर हत्येचा पोबारा केला. या प्रकरणात तक्रार करणारा भूषण पाटील हाच आरोपी असल्याचं पोलिसांच्या तपासातून समोर आलंय.
नेमकं काय घडलं :पोलिसांच्या माहितीनुसारशनिवारी (9 डिसेंबर) संध्याकाळी सतीश पाटील (वय 55, रा. वर्तकनगर) आणि त्याचा मित्र भूषण बाळू पाटील (वय 40, रा.आनंदनगर) हे सोबतच कासारवडवली येथे सतीशच्या गाडीतून आले. विहंग व्हॅली चौकात आल्यानंतर गाडी थांबली अन् भूषण पाटील गाडीच्या खाली उतरला. त्यानंतर लगेच दुचाकीवर येत हल्लेखोरांनी सपासप वार करीत सतीशची हत्या केली. या गुन्ह्यात भूषण पाटील हाच तक्रारदार होता. मात्र, पोलिसांनी त्याची चौकशी केल्यानंतर त्यानं सुपारी देऊन हत्या केली असल्याची माहिती समोर आली. या प्रकरणी कासारवडवली पोलिसांनी आरोपी भूषण पाटील आणि नितीन पाटील या दोघांना अटक केली आहे. या हत्येत अन्य काहींचा सहभाग असल्याचा पोलिसांना संशय आहे. त्यामुळं पोलिसांनी चार पथकं बनवून फरार आरोपींचा शोध घेण्यास सुरुवात केली आहे, अशी माहिती पोलीस उपायुक्त परिमंडळ-5 चे अमरसिंग जाधव यांनी दिली.