मलेशियातील केदाहच्या सुलतानाला मुंबईतील वृक्ष संवर्धनाची भुरळ

मुंबई महापालिका झाडांचे बुरशीपासून संरक्षण आणि संवर्धनासाठी गेरू आणि चुन्याच्या लेपनाच्या शास्त्रीय पद्धतीचा वापर करते. मलेशियातील केदाह राज्याचे राजे सुलतान सालेहऊदिन इबनी अलमरहूम सुलतान बदलीशाह यांना या पद्धतीने भुरळ घातली आहे.

मुंबई - मुंबईकरांना आरोग्य, शिक्षण, पाणी, रस्ते आदी मूलभूत सुविधा पुरवणारी महापालिका पर्यावरण आणि वृक्ष संवर्धनातही आघाडीवर आहे. मुंबई महापालिका झाडांचे बुरशीपासून संरक्षण आणि संवर्धनासाठी गेरू आणि चुन्याच्या लेपनाच्या शास्त्रीय पद्धतीचा वापर करते. मलेशियातील केदाह राज्याचे राजे सुलतान सालेहऊदिन इबनी अलमरहूम सुलतान बदलीशाह यांना या पद्धतीने भुरळ घातली असून, त्यांनी मलेशियातही याचा वापर करण्याचे आदेश तेथील प्रशासनाला दिले आहे.

हेही वाचा -राज्यात शुक्रवारी 3670 नवीन कोरोनाबाधित; 36 रुग्णांचा मृत्यू

उद्यान विभागाच्या कामांचे कौतुक

मलेशियातील केदाह राज्याचे राजे सुलतान सालेहऊदिन इबनी अलमरहूम सुलतान बदलीशाह हे काही दिवसांसाठी मुंबई भेटीला आले होते. त्यावेळी त्यांना मुंबईतील सार्वजनिक परिसरातील वृक्षांच्या खोडांना तांबड्या व पांढऱ्या रंगाचे वैशिष्टपूर्ण लेपन दिल्याचे आढळले. ते मलेशियात परत गेल्यानंतर मलेशियाच्या वाणिज्यदुतांना या मागील कारणांची माहिती घेण्यास सांगितले. त्यानुसार मलेशियाचे मुंबईतील वाणिज्यदूत जैनल अजलान मोहम्मद नादजिर यांनी भायखळा येथील वीरमाता जिजाबाई भोसले उद्यान येथील महापालिकेच्या उद्यान विभागाला भेट देऊन झाडांना रंग देण्याची कारणे, पद्धती व प्रक्रिया जाणून घेतली. तसेच, मुंबईच्या धर्तीवर मलेशियातील झाडांना देखील गेरू व चुन्याचे लेपन देणार असल्याचे त्यांनी सांगितले.

महापालिकेचे उद्यान अधीक्षक जितेंद्र परेदशी यांच्यासह अधिकारी व कर्मचारी यांनी नादजिर यांना याबाबत माहिती दिली. नादजिर यांनी उद्यान विभागाच्या कामांचे कौतुक केले, तसेच त्यांनी मलेशियातील उद्यानांची माहिती देणारे एक पुस्तक उद्यान विभागाला भेट दिले. तर, उद्यान विभागाद्वारे ‘फायकस’ या प्रकारातील बोनसाय झाड नादजिर यांना भेट देण्यात आले.

पालिका करते ७०० उद्यानांसह लाखो वृक्षांचे संरक्षण, संवर्धन

मुंबईतील तब्बल ७०० उद्यानांसह लाखो वृक्षांच्या संरक्षण आणि संवर्धनाची जबाबदारी मुंबई महापालिका यशस्वीपणे पार पाडत आहे. सार्वजनिक परिसरातील वृक्षांच्या संरक्षणासाठी खोडांना तांबड्या व पांढऱ्या रंगाचे म्हणजे, गेरू आणि चुन्याचे वैशिष्टपूर्ण लेपन केले जाते. गेरूमध्ये अम्लीय गुणधर्म असतात, तर चुन्यामध्ये अल्कधर्मी गुणधर्म असतात. गेरू व चुन्याच्या लेपनामुळे झाडांचे बुरशी, वाळवी, खोडकिड्यापासून संरक्षण होते. त्याचबरोबर दृश्यमानता वाढून संभाव्य अपघातांचे प्रमाण कमी होते, शहराच्या सौंदर्यातही भर पडते. ही झाडे सार्वजनिक संस्थेच्या मालकीची असल्याचेही यातून अधोरेखित होते. महापालिकेच्या या वृक्ष संरक्षण आणि संवर्धनाबद्दल सर्वसामान्यांपासून ते देशीपरदेशी पर्यटक, राजकीय नेते, उच्चायुक्त यांच्यात कुतूहल पाहायला मिळत आहे.

हेही वाचा -राज्यपाल आणि राज्यसरकार : फक्त वाद, नो संवाद!