काजरोळकर यांच्या पुस्तकातून विद्यार्थ्यांना मिळणार वृत्तपत्रलेखनाचे धडे

काजरोळकर हे त्यांच्या निवडक पत्रांचे पुस्तक तरुणांसमोर आणणार आहेत. ३० वर्षात लिहिलेल्या २००० पत्रांपैकी काही पत्रांचा त्यात समावेश असणार आहेत. आपल्या पुस्तकाच्या माध्यमातून ते विद्यार्थ्यांना वृत्तपत्रलेखन म्हणजे काय ? याबाबत माहिती देणार आहे.

मुंबई - वृत्तपत्रे जोमात सुरू अस्तानाच्या काळात वृत्तपत्र लेखकांना मानाचे स्थान होते. तेव्हा वृत्तपत्रात छापून आलेल्या त्यांच्या पत्रांची दखल घेतली जायची. आज तरुण पिढी वृत्तपत्र लेखनच काय वाचनही करत नाही, अशी परिस्थिती आहे. वृत्तपत्र लेखक म्हणजे काय? त्यांची जबाबदारी काय ? याबाबत तरुण पिढीला कळावे, यासाठी ज्येष्ठ वृत्तपत्र लेखक कृष्णा काजरोळकर यांच्याशी 'ईटीव्ही भारत' चे प्रतिनिधी अक्षय गायकवाड यांनी चर्चा केली.

काजरोळकर हे त्यांच्या निवडक पत्रांचे पुस्तक तरुणांसमोर आणणार आहेत. ३० वर्षात लिहिलेल्या २००० पत्रांपैकी काही पत्रांचा त्यात समावेश असणार आहेत. ऐंशी आणि नवदीच्या दशकात वृत्तपत्रलेखकांना मोठी मागणी होती. वृत्तपत्राच्या पानावर पत्रलेखनाला विशेष जागा आहे. परंतु, कालांतराने पत्रलेखक कमी झाले. त्यावेळी वृत्तपत्र लेखकाला समाजात विशेष मान होता. आता तरुण पिढीने वृत्तपत्र लेखनाकडे पाठ फिरवली आहे. विभागात असलेल्या काही समस्या आणि आपल्या मनातील भावना व्यक्त करण्यासाठी वृत्तपत्र लेखनाचा वापर केला जात होता. वेळोवेळी सरकारला कानपिचक्या देण्याचे कामही वृत्तपत्रलेखक करत असत. वृत्तपत्रातील पत्रलेखन कसे असावे, याबाबत काजरोळकर यांनी खास मार्गदर्शन केले.

मी गेल्या अनेक वर्षापासून पत्र लिहीत आहे. या पत्राच्या माध्यमातून मी माझ्या विभागातील अनेक समस्या लोकांसमोर आणि प्रशासनासमोर आणल्या आहेत. अनेक समस्या छापून आल्यानंतर त्या समस्या लवकर सोडवल्या जातात, असा माझा अनुभव आहे. मात्र, कालांतराने वृत्तपत्र लेखनाकडे तरुण पिढीचे दुर्लक्ष झाले आहे. यासाठी मी माझ्या निवडक पत्रांचे पुस्तक प्रकाशित करत आहे. माझे पुस्तक घेऊन मी अनेक शाळांमध्ये जाईल व तेथील विद्यार्थ्यांना माझा पुस्तकाच्या माध्यमातून पत्रलेखनाबाबत समजून सांगणार आहे, असे काजोळकर म्हणालेत.

हेही वाचा-मुंबईत अक्‍सा समुद्रकिनाऱ्यावर २ तरुण बुडाले; एक सुखरूप, तर एकाची प्रकृती चिंताजनक