बनावट मद्य विक्री आणि मद्य प्राशन करणाऱ्या तळीरामांवर होणार कारवाई

डिसेंबर महिन्याच्या अखेर आणि जानेवारी महिन्याच्या सुरूवातीला अवैध मद्य विक्रीचे प्रमाण जास्त असते. याबाबत राज्य उत्पादन शुल्क विभाग अधिक दक्षतेने काम करणार आहे. यासाठी मुंबईमध्ये येणाऱ्या वाहनांची कसून तपासणी केली जाणार आहे.

मुंबई -डिसेंबर महिन्यात नाताळ आणि नवीन वर्षाचे स्वागत करताना पार्ट्यांमध्ये दारूचा वापर केला जातो. याच काळात मोठ्या प्रमाणात अवैध दारूचा व्यवसाय होतो. याला आळा घालण्यासाठी पार्ट्यांमध्ये अवैध दारू सापडल्यास विक्रेते आणि ग्राहक या दोघांवर कारवाई करण्याचा निर्णय राज्य उत्पादन शुल्क विभागाने घेतला आहे. यासाठी मुंबईमध्ये येणाऱ्या वाहनांची कसून तपासणी केली जाणार आहे.

डिसेंबर महिन्याच्या अखेर आणि जानेवारी महिन्याच्या सुरूवातीला अवैध मद्य विक्रीचे प्रमाण जास्त असते. याबाबत राज्य उत्पादन शुल्क विभाग अधिक दक्षतेने काम करणार आहे. विनापरवाना, भेसळयुक्त मद्याचा वापर सार्वजनिक समारंभांसाठी करू नये, असे आवाहन राज्य उत्पादन शुल्क विभागाच्या आयुक्त प्राजक्ता लवंगारे यांनी केले आहे.

हेही वाचा - पीएमसी बँक घोटाळा : अध्यक्ष वरियंम सिंग यांच्या घराबाहेर आंदोलन

महाराष्ट्रात दारू महाग आहे. त्यामुळे सीमेलगत असलेल्या गोवा, दमण, दादरा, नगर हवेली, सिल्वासा या राज्यातून उत्पादन शुल्क न भरता बनावट दारू राज्यात येण्याची शंका राज्य उत्पादन शुल्क विभागाला आहे. त्यासाठी राज्य उत्पादन शुल्क विभागाने 9 भरारी पथके तयार केली असून त्यांच्या माध्यमातून मुंबईबाहेरून येणाऱ्या गाड्यांची तपासणी मोहिम राबवण्यात येणार आहे.