मुंबई- मुंबई महानगरपालिकेत गेले २५ वर्ष शिवसेनेची सत्ता आहे. या सत्तेच्या काळात शिवसेनेचा भाजपा हा मित्र पक्ष होता. मात्र, राज्यात महाविकास आघाडी सरकार सत्तेवर येताच मुंबई महापालिकेत भाजपाने विरोधाची भूमिका घेतली. यामुळे पालिकेत शिवसेनेला राष्ट्रवादी, समाजवादी पक्षाने खुले मतदान करत, तर काँग्रेसने तटस्थ राहून आघाडीचा धर्म पाळला आहे.
२०१४ मध्ये केंद्रात आणि राज्यात भाजपाची सत्ता येताच २०१७ ची निवडणूक भाजपा आणि शिवसेनेने वेगवेगळी लढवली. निवडणूक वेगवेगळी लढवली तरी महापौर पदाच्या निवडणुकीत भाजपाने शिवसेनेच्या उमेदवाराला पाठिंबा दिला. हा पाठिंबा देताना भाजपाने आपण पालिकेतील कोणत्याही पदाची निवडणूक लढवणार नाही, कोणत्याही पदावर दावा करणार नाही, असे जाहीर केले. यामुळे विरोधी पक्ष नेते पद नियमानुसार काँग्रेसला मिळाले.
२०१९ मध्ये राज्यातील समीकरणे बदलली. भाजपा आणि शिवसेनेची युती तुटली. शिवसेना, राष्ट्रवादी, काँग्रेसने सरकार स्थापन केले. भाजपाला विरोधी पक्षात बसावे लागले. यामुळे भाजपाने मुंबई महापालिकेतही विरोधी पक्षात बसण्याचा निर्णय घेतला. याच दरम्यान पालिकेच्या वैधानिक, विशेष आणि प्रभाग समितीच्या निवडणुका भाजपाने लढवण्याची घोषणा केली. भाजपा निवडणूक लढवताना काही दगा फटका करेल, म्हणून पालिकेत विरोधी पक्षात असलेल्या राष्ट्रवादी काँग्रेस आणि समाजवादी पक्षाने खुलेआम सत्ताधारी शिवसेनेला मतदान केले. तर, काँग्रेसने तटस्थ राहून शिवसेनेला मदत केली. याबाबत भाजपाने नाराजी व्यक्त केली आहे. शिवसेना पुरस्कृत विरोधी पक्ष काँग्रेसने निवडणुकीपूर्वी नांगी टाकल्याची टीका भाजपाने केली आहे. यामुळे पालिकेत खरा विरोधी पक्ष कोण? हे मुंबईकरांना कळले असल्याचे भाजपाचे गटनेते प्रभाकर शिंदे यांचे म्हणणे आहे.