मुंबई- लॉकडाऊनचा वृद्धाश्रमावर परिणाम होऊ नये म्हणून स्वतः हून काही जणांनी पुढाकार घेतला आहे. पालघर जिल्ह्यात असलेले शांतिनिवास सेवाग्राम वृद्धाश्रमाने लॉकडाऊनच्या काळात अडचणींवर मात करत आश्रमात असलेल्या नागरिकांसाठी सर्व गोष्टींची पूर्तता केली आहे.
माहिती देताना 'ईटीव्ही भारत' प्रतिनिधी
आश्रमातील ज्येष्ठ नागरिकांसाठी लागणारा रोजचा दुधाचा पुरवठा इथल्याच गोशाळेतून होत आहे. साडे पाच एकरमध्ये असलेल्या या संस्थेच्या आवारातच रोजचा भाजीपाला व कडधान्याचे उत्पादन घेतले जात असल्याने लॉकडाऊनचा कुठलाही त्रास या वृद्धाश्रमाला नाही. लॉकडाऊन असल्याने परिस्थितिचे गांभीर्य लक्षात घेता सध्या बाहेरून हे वृद्धाश्रम बंद करण्यात आले असले, तरी आतमध्ये असलेल्या जेष्ठ महिला व पुरुष नागरिकांचे मानसिक संतुलन राखण्यासाठी येथील साई मंदिरात प्रवचन सुरू करण्यात आले आहे.