सचिन वाझे प्रकरण : 'ती' महिला हॉटेल ट्रायडेंट मधलीच, सूत्रांची माहिती

शुक्रवारी एनआयए कार्यालयामध्ये जी महिला आली होती. जिच्यासाठी कमालीची गुप्तता पाळण्यात आली होती. तीच महिला आहे, जी वाझे सोबत हॉटेल ट्रायडेंटमध्ये होती, अशी माहिती सूत्रांनी दिली.

मुंबई -सचिन वाझे प्रकरणात रोज नवनवीन खुलासे समोर येत आहेत. अँटिलिया कार स्फोटक प्रकरण आणि मनसुख हिरेन हत्या प्रकरण याचा तपास एनआयए करत आहे. या प्रकरणात आत्तापर्यंत आणि सीसीटीव्ही फुटेज तसेच अनेक दस्तावेज तपासण्यात आले आहेत. या प्रकरणात सचिन वाझे यांनी हॉटेल ट्रायडेंटमध्ये एक रुम बुक केल्याचे देखील समोर आले होते. तसेच या ट्रायडेंट हॉटेल मधला एक सीसीटीव्ही फुटेज एनआयएच्या हाती लागला होता. या सीसीटीव्ही फुटेजमध्ये वाझेच्या हातात काही बॅग दिसत होत्या. तसेच त्यांच्यासोबत एक महिला देखील दिसत होती. याच महिलेचा शोध मागच्या अनेक दिवसांपासून एनआयए घेत होती. अखेर ती महिला समोर आली आहे.

शुक्रवारी सायंकाळच्या सुमारास कमालीची गुप्तता पाळत एनआयए कार्यालयात काळ्या रंगाच्या काचा असलेली एक गाडी आत शिरली आणि कार्यालयाच्या मागच्या बाजूने असलेल्या गेटमधून ती महिला एनआयए कार्यालयात गेली. माध्यमांना या महिलेचे फोटोज अथवा व्हिडिओ मिळू नये म्हणून एक गाडी गेटच्या समोर आडवी लावण्यात आली होती.

काही तासांच्या चौकशीनंतर पुन्हा दोन महिला या मागच्या गेटने बाहेर येऊन गाडीत बसल्या. एक महिला पुढच्या सीटवर बसली तर दुसरी महिला गाडीच्या मागच्या सीटवर जाऊन बसली. प्रसार माध्यमांना फोटोज अथवा व्हिडिओ मिळू नये म्हणून प्रसारमाध्यमांची नजर चुकवत महिला मागच्या बाजूला असणाऱ्या सीट खाली लपली. मात्र माध्यमांनी या महिलेची हालचाल आपल्या कॅमेर्‍यात टिपली.

ही महिला हॉटेल ट्रायडेंटमधलीच

हॉटेल ट्रायडेंटमध्ये वाझे फेब्रुवारी महिन्यातील काही दिवस राहिले होते. यावेळेस हॉटेल ट्रायडेंट मधल्या सीसीटीव्ही फुटेजमध्ये वाझे कैद झाले होते. या सीसीटीव्ही फुटेजमध्ये त्यांच्या हातामध्ये काही बॅग होत्या. त्याच बरोबर वाझे यांच्यासोबत एक महिला देखील बॅग घेऊन जाताना कैद झाली होती. सूत्रांकडून मिळालेल्या माहितीनुसार, शुक्रवारी एनआयए कार्यालयामध्ये जी महिला आली होती. जिच्यासाठी कमालीची गुप्तता पाळण्यात आली होती. तीच महिला आहे, जी वाझे सोबत हॉटेल ट्रायडेंट मध्ये होती.या महिलेचे शुक्रवारी स्टेटमेंट रेकॉर्ड करण्यात आले. तसेच या मिस्ट्री वूमन संदर्भात लवकरच खुलासा होणार असल्याचे कळते.

प्रकरणात आणखी एक नवी कार

वाझे प्रकरणात शुक्रवारी आणखी एका कारची भर पडली आहे. वाझे प्रकरणात आत्तापर्यंत 7 अलिशान गाड्या एनआयएने जप्त केल्या आहेत. त्यात आज 8 व्या गाडीची भर पडली आहे. एक पांढऱ्या रंगाची गाडी शुक्रवारी एनआयएने ताब्यात घेतली आहे. ही गाडी वाझेच चालवत असल्याचा संशय आहे.