मुंबई -मुलुंडमधील निर्मल लाईफ स्टाईलच्या झिरकोन को.ऑप. हाऊसिंग सोसायटीतमध्ये महावितरणच्या तपासणी दरम्यान 1,76,100 युनिटची तब्बल 62 लाखांची वीजचोरी उघडकीस आली आहे. याबाबत मुलुंड पोलीस ठाण्यात विद्युत कायदा 2003 अंतर्गत झिरकोन को.ऑप. हाऊसिंग सोसायटीवर गुन्हा दाखल करण्यात आला आहे.
वीजचोरांचे धाबे दणाणले -
महावितरणचे अधिकारी आपल्या नियमित चेकिंगसाठी मुलुंड पश्चिम येथील निर्मल लाईफ स्टाईलच्या झिरकोन को. ऑप. हाऊसिंग सोसायटीत गेले असता वीजचोरी होत असल्याचा संशय महावितरणच्या अधिकाऱ्यांना आला. तेथील सखोल चौकशी केल्यानंतर या 39 मजली इमारतीच्या बांधकामासाठी लागतच्या बीएमसीच्या आऊट-गोइंग स्विचला, दुसरी विनामीटर केबल जोडून 2 वर्षांपासून वीजचोरी करीत असल्याचे आढळून आले. या प्रकरणात महावितरणने मुलुंड पोलीस ठाण्यात विद्युत कायदा 2003 अन्वये कलम 135 नुसार निर्मल लाईफ स्टाईल व झिरकोन को.ऑप. हाऊसिंग सोसायटीवर गुन्हा दाखल केला असून पोलीस याबाबत पुढील चौकशी करत आहे. महावितरणने, झिरकोन को.ऑप. हाऊसिंग सोसायटीला दंडासोबत 63.23 लाखांची रक्कम भरण्यास सांगितले होते. ही रक्कम न भरल्यामुळे त्यांच्यावर 4 जूनरोजी गुन्हा दाखल करण्यात आला आहे. ही घटना समोर आल्यामुळे, वीजचोरांचे धाबे दणाणले आहेत.
