मुंबई - महाराष्ट्र राज्य परिवहन महामंडळाच्या (एसटी) कर्मचाऱ्यांसाठी कुर्ला, विद्याविहार येथे निवासी संकूल व शाळा उभारण्यात येणार आहे. त्याचबरोबर, मुंबई सेंट्रल एसटी मुख्यालय व आगाराच्या इमारतीची पुनर्बांधणी होणार आहे. या दोन्ही कामांचा भूमीपूजन सोहळा होता. यावेळी उद्धव ठाकरे यांच्या हस्ते सदरील कामाचे भूमीपूजन करण्यात आले.
ते म्हणाले की, काल जो पाऊस पडला तो विक्रम तोडणारा होता. काही दिवसाचा पाऊस आता काही तासात पडू लागला आहे. मात्र, या परिस्थितीतही एसटी महामंडळाने आपली सेवा कायम ठेवून जनतेची सेवा केली आहे. महाराष्ट्राच्या जनतेला प्रदूषणमुक्त अशी इलेक्ट्रिक बसेस मिळाली आहेत. दिवाकर रावते आमचे मंत्री याबाबत काम करत आहेत. शिवसेनेच्या मंत्र्यांनी एसटीमध्ये बदल केला आहे, त्याचे मी काही श्रेय घेणार नाही. यापुढचे सरकार आपलेच असणार आहे. मुख्यमंत्री देवेंद्र फडणवीस यांनी परिवहन विभागाच्या बदलत्या स्वरूपाला जी मदत केली आहे ती महत्त्वाची आहे, असे देखील उध्दव ठाकरे यांनी यावेळी सांगितले.