मुंबई - कोरोना विषाणूच्या दहशतीमुळे अनेक ठिकाणी कामे बंद करण्यात आली आहेत. याचा फटका नाक्यांवरील मजुरांना बसला आहे. दिवसभर नाक्यावर बसूनही काम मिळत नसल्याची खंत विक्रोळी पश्चिम येथील नाका कामगारांनी व्यक्त केली. कोरोनामुळे उपासमारीची वेळ आली असल्याची भावना या कामगारांनी व्यक्त केली.
कोरोना विषाणूच्या पार्श्वभूमीवर नाका कामगारांना काम मिळेनासे झाले
शहरातील नाक्यांवर दररोज सकाळी शेकडो महिला आणि पुरुष रोजगाराच्या शोधात उभे राहतात. नाका कामगारांना शहरातील इमारतींच्या बांधकामासाठी, झोपडपट्टीतील छोटे-मोठे खोदकाम, लाईट फिटिंग, रंगकाम, प्लंबिंग अशी 300 ते 400 रुपये रोजाची कामे मिळतात. मात्र, मागील चार ते पाच दिवसांपासून मुंबईत कोरोना विषाणूचा विळखा वाढत आहे. या पार्श्वभूमीवर रोज वेगवेगळ्या इमारतीत आणि घरी कामाला जावे लागणाऱ्या नाका कामगारांना सध्या कोणी काम देत नाही.