मुंबई - कोरोना व्हायरसचा प्रादुर्भाव लक्षात घेता राज्यात मोठ्या प्रमाणात रुग्णांची संख्या वाढत आहे. देशाची आर्थिक राजधानी असलेल्या मुंबई शहरात कोरोना व्हायरस रुग्ण झपाट्याने वाढत आहेत. कोरोना व्हायरसवर नियंत्रण ठेवण्यासाठी नागरिकांनी स्वतः जवाबदारी घेत घराबाहेर पडू नये, असे पोलिसांकडून आवाहन करण्यात येत आहे.
मुंबई पोलीस आयुक्तांची बनावट ध्वनिफीत सोशल माध्यमांवर व्हायरल गेल्या काही दिवसांपासून मुंबई पोलीस आयुक्त परमबीर सिंग यांच्या नावाने एक ऑडिओ मेसेज सोशल माध्यमांवर फिरत आहे. या ऑडिओ मेसेजमध्ये मुंबई पोलीस आयुक्त नागरिकांना रस्त्यावर फेरफटका मारण्यासाठी न उतरण्याचे आवाहन करत असून रस्त्यावर विनाकारण वाहन घेऊन येणाऱ्या वाहनचालकांच्या विरोधात दंडात्मक कारवाई करण्याचे आदेश देताना ऐकायला मिळत आहेत. सोशल माध्यमांवर सध्या ही ऑडिओ क्लिप प्रचंड व्हायरल झाली आहे.
मुंबई पोलीस आयुक्तांची बनावट ध्वनिफीत सोशल माध्यमांवर व्हायरल मात्र ही ऑडिओ क्लिप मुंबई पोलीस आयुक्त परमबीर सिंग यांची नसल्याचे मुंबई पोलिसांकडून स्पष्ट करण्यात आले आहे. मुंबई पोलिसांच्या ट्विटर हँडलवर स्पष्ट करण्यात आले आहे, की विविध माध्यमांमध्ये ही ध्वनीफीत पोलीस आयुक्त, मुंबई यांचे नावे प्रसारित होत आहे. या ध्वनीफितीमध्ये आक्षेपार्ह काही नसले, तरी यातील आवाज अथवा संदेश हा पोलीस आयुक्त, मुंबई यांचा नाही. मुंबईकरांनो, कृपया आयुक्तांचा म्हणून हा संदेश यापुढे अग्रेषित करू नये ,असं आवाहन मुंबई पोलिसांनी केले आहे.
