पुणे सनबर्न घातपात प्रकरणातील फरार आरोपी पश्चिम बंगालमध्ये जेरबंद

मुंबईतील काळाचौकी पोलीस ठाण्यात ऑगस्ट 2018 एटीएसकडून नालासोपारा स्फोटक आणि शस्त्रसाठा प्रकरण तसेच पुण्यातील सनबर्न फेस्टिवल 2017 च्या घातपाती कटाबद्दल विविध कलमांनुसार गुन्हा नोंदविण्यात आला होता. यानंतर प्रताप हाजरा हा फरार झाला होता.

मुंबई - नालासोपारा येथील स्फोटक आणि हत्यारांचासाठा बाळगणारा, तसेच 2017 च्या सनबर्न फेस्टिवल घातपाताच्या कटातील फरार आरोपीला जेरबंद करण्यात पोलिसांना यश आले आहे. पश्चिम बंगालमधील उष्टी येथून आरोपीला ताब्यात घेण्यात आले आहे. महाराष्ट्र एटीएसने ही कारवाई केली. प्रताप उद्दिष्टर हाजरा उर्फ प्रताप हाजरा (वय - 34) असे या आरोपीचे नाव आहे.

मुंबईतील काळाचौकी पोलीस ठाण्यात ऑगस्ट 2018 एटीएसकडून नालासोपारा स्फोटक आणि शस्त्रसाठा प्रकरण तसेच पुण्यातील सनबर्न फेस्टिवल 2017 च्या घातपाती कटाबद्दल विविध कलमांनुसार गुन्हा नोंदविण्यात आला होता. यानंतर प्रताप हाजरा हा फरार झाला होता. याप्रकरणी आतापर्यंत 12 जणांना अटक करण्यात आली होती. यातील बऱ्याच आरोपींना प्रताप हाजरा याने गावठी बॉम्ब बनविण्याचे प्रशिक्षण दिले होते. यातूनच डिसेंबर 2017 मधील सनबर्नमध्ये घातपात घडविण्याचा कट रचण्यात आला होता. महाराष्ट्र एटीएसने 20 जानेवारीला आरोपी प्रताप हाजरा यास पश्चिम बंगालच्या एसटीएफ आणि पश्चिम बंगाल पोलिसांच्या मदतीने अटक केली. यानंतर त्याला न्यायालयात हजर केले असता, न्यायालयाने आरोपीची 30 जानेवारीपर्यंत पोलीस कोठडीत रवानगी केली आहे.

हेही वाचा -कंगना रनौतचं इंदिरा जयसिंगवर टीकास्त्र, म्हणाली अशा महिलांना....

दरम्यान, नालासोपारा शस्त्रसाठाप्रकरणी अटक करण्यात आलेल्या आरोपींविरुद्ध विशेष सत्र न्यायालयात आरोपपत्र दाखल करण्यात आलेले आहे. या प्रकरणात अटक करण्यात आलेला पहिला आरोपी वैभव राऊत याच्यासह १२ जणांविरुद्ध ६ हजार ४८२ पानांचे आरोपपत्र दाखल करण्यात आले आहे. नालासोपारा येथून अटक करण्यात आलेले वैभव राऊत, शरद कळसकर, सुधन्वा गोंधळेकर यांच्यावर स्फोटके बाळगल्याप्रकरणी १० ऑगस्ट २०१८ रोजी गुन्हा दाखल करण्यात आला होता.

हेही वाचा -भारतीय राज्यघटनेची ७० वर्षे : विकास, कलम ३७० आणि सीएए..

यामध्ये वैभव राऊत, शरद कळसकर, सुधन्वा गोंधळेकर, श्रीकांत पांगारकर, अविनाश पवार, विजय लोधी, वासुदेव सुर्यवंशी, प्रविण रंगास्वामी, भारत कुरणे, अमोल काळे, अमित बड्डी, गणेश मिथून यांच्याविरुद्ध एटीएसने न्यायालयात आरोपपत्र दाखल केले आहे. अटक करण्यात आलेले सर्व आरोपी हे वेगवेगळ्या हिंदूत्ववादी संघटनांचे आहेत. तसेच हिंदुराष्ट्र निर्मितीसाठी प्रेरित होऊन त्यांनी समविचारी लोकांची टोळी उभी केल्याचा आरोप, या आरोपपत्रात करण्यात आलेला आहे. सोबतच सनातन संस्थेच्या क्षात्रधर्म साधना या पुस्तकात नमूद केल्याप्रमाणे हिंदूराष्ट्र निर्मितीसाठी ते प्रयत्न करत असल्याचेही आरोपपत्रात म्हणण्यात आले आहे.