मुंबई - मोदी सरकारच्या डिजिटल इंडिया योजनेची शनिवारी राज ठाकरेंनी पोलखोल केली. यानंतर विनोद तावडेंनी ठाकरे यांच्या पक्षावर गंभीर टीका केली. तावडेंच्या टीकेला उत्तर देताना, तावडेंच्या xxx दम असेल, तर त्यांनी आम्ही केलेले आरोप खोटे असल्याचे सिद्ध करावे अन्यथा राजकारण सोडावे, असे मनसे नेते संदीप देशपांडे यांनी म्हटले आहे.
मनसे अध्यक्ष राज ठाकरे यांनी शनिवारी गुढीपाडवा मेळाव्यात केलेले भाषण हे भाजप नेत्यांच्या जिव्हारी लागले आहे. त्यातूनच तावडेंनी ठाकरे यांच्या पक्षावर गंभीर टीका केली. ठाकरे यांनी शनिवारच्या भाषणात मोदींच्या डिजिटल इंडियाची पोलखोल केली होती. यामुळे संतप्त झालेले तावडे यांनी रविवारी पत्रकार परिषद घेतली. ते म्हणाले की, एवढा अभ्यास पक्षासाठी केला असता तर फायदा झाला असता. आधी कष्ट घेतले असते तर दुसऱ्याला मदत करायची वेळ आली नसती.
तावडेंच्या या प्रतिक्रियेला प्रत्युत्तर देताना देशपांडे म्हणाले, माझे तावडे यांनाच नाही, तर भारतीय जनता पक्षाच्या नेत्यांना आव्हान आहे. त्यांनी ठाकरे यांनी उपस्थित केलेल्या प्रश्नांची उत्तरे द्यावी, नाही तर फालतू बडबड बंद करावी. आम्ही हरिसाल येथील जी पोलखोल केली त्याबाबत तावडे जे म्हणाले आहेत. त्यांना माझे खुले आव्हान आहे. त्यांनी आमच्यासोबत यावे आणि खरे खोटे करावे. आम्ही सादर केलेली एक गोष्टदेखील खोटी निघाली तर आम्ही राजकारण सोडू नाहीतर त्यांनी राजकारण सोडावे. राज यांच्या वाक्यांची मोडतोड करून चुकीचा अर्थ काढला जात आहेत. ती भाजपची जुनी सवय आहे. खोट बोला पण रेटून बोला, असेही ते यावेळी म्हणाले.