मुंबई- चुनाभट्टी येथील एव्हरार्ड नगर येथून एमएमआरडीए या पट्ट्याला जोडणाऱ्या पुलाचे उद्घाटन करण्यासाठी राष्ट्रवादी काँग्रेसचे आमदार नवाब मलिक यांच्या आंदोलनाला एमएमआरडीए प्रशासन घाबरले आहे. आज सकाळी नवाब मलिक यांच्याकडून आंदोलनाचा दणका देताच आठ दिवसात पूल सुरू करण्याचे ठोस आश्वासन एमएमआरडीएच्या अधिकाऱ्यांकडून देण्यात आले आहे. प्रियदर्शनी पुलाजवळ असलेल्या ज्या जेसीबी मशिनीवर नवाब मलिक आणि त्यांचे कार्यकर्ते उभे होते. त्याच मशिनीवर येऊन एमएमआरडीएच्या अधिकाऱ्यांनी एमएमआरडीएच्या आयुक्तांशी फोनवरून बोलून हे आश्वासन दिले.
आज सकाळी साडेदहा वाजता एव्हरार्ड नगर येथून एमएमआरडीए या पट्ट्याला जोडणाऱ्या पुलाचे उद्घाटन करण्यासाठी राष्ट्रवादी काँग्रेसचे शेकडो कार्यकर्ते चुनाभट्टी येथील एव्हरार्ड नगर परिसरात जमा झाले होते. मात्र, त्यापूर्वीच प्रशासनाकडून मोठ्या प्रमाणात पोलीस बंदोबस्त ठेवण्यात आला होता. राष्ट्रवादीचे कार्यकर्ते चुनाभट्टी येथील पूलाच्या जवळ येण्यापूर्वीच त्यांना प्रियदर्शनी पुलाजवळ अडवण्यात आले. तसेच त्या ठिकाणी राष्ट्रवादीचे नेते व आमदार नवाब मलिक यांनी हे आंदोलन मागे घ्यावे, आम्ही येत्या आठ दिवसात हा पूल सुरू करू, असे स्पष्ट आश्वासन एमएमआरडीएने मलिक यांना दिले. त्यानंतर मलिक यांनी आपण हे आंदोलन मागे घेत असल्याचे जाहीर केले.
मागील अनेक दिवसांपासून तयार असूनही या पुलाचे उद्घाटन होत नव्हते. त्यामुळे आज राष्ट्रवादी काँग्रेसचे आमदार नवाब मलिक यांनी या पुलाचे उद्घाटन करून हा पूल सुरू करण्याचा इशारा दिला होता. त्या इशाऱ्याला एमएमआरडीए प्रशासन घाबरले. चुनाभट्टी येथील एव्हरार्ड नगर ते एमएमआरडीए या पट्ट्याला जोडणारा हा पूल आघाडी सरकारच्या काळात मंजूर करण्यात आला होता. त्यावेळी पुलाचे काही काम सुरू झाले होते. परंतु, मागील पाच वर्षात या पुलाचे काम अत्यंत संथ गतीने झाले. विधानसभा निवडणुकीच्या काही दिवस अगोदर या पुलाचे पूर्ण काम झाले होते. मात्र, त्याचे उद्घाटन झाले नसल्याने मलिक यांनी या पुलामुळे स्थानिकांना प्रचंड वाहतुकीचा त्रास होत असल्याने आपण याचे उद्घाटन करणार असल्याचा इशारा तीन दिवसांपूर्वी दिला होता.