'हे कायद्याचं राज्य; कोणीही हातात दगड, तलवार घेण्याची भाषा करू नये'

हे कायद्याचं राज्य आहे, त्यामुळे कोणीही हातात दगड, तलवार घेण्याची भाषा करू नये असे वक्तव्य अल्पसख्यांक मंत्री नवाब मलिक यांनी केले. नवाब मलिक यांनी राज ठाकरेंच्या वक्तव्याला प्रतिउत्तर दिले आहे.

मुंबई -हे कायद्याचं राज्य आहे, त्यामुळे कोणीही हातात दगड, तलवार घेण्याची भाषा करू नये असे वक्तव्य अल्पसख्यांक मंत्री नवाब मलिक यांनी केले. जास्त नाटकं कराल तर दगडाला दगडाने आणि तलवारीला तलवारीने उत्तर दिलं जाईल, असा इशारा मनसे अध्यक्ष राज ठाकरे यांनी सीएए आणि एनआरसी विरोधात मोर्चे काढणाऱ्यांना दिला होता. त्यानंतर नवाब मलिक यांनी राज ठाकरेंच्या वक्तव्याला प्रतिउत्तर दिले आहे.

राज ठाकरे यांनी सुधारित नागरिकत्व कायदा आणि एनआरसीला पाठिंबा दर्शवला आहे. तसेच दगडाला उत्तर दगडाने, तलवारीला उत्तर तलवारीने देऊ असे सडेतोड भाषण त्यांनी केले. यावरवरुन राष्ट्रवादी काँग्रेसचे नेते आणि राज्याचे मंत्री नवाब मलिक यांनी राज ठाकरे यांच्यावर टीका केली. देशात कायद्याचे राज्य आहे. कोणी कायदा हातात घेतला तर कायदा कायद्याचे काम करील असे नवाब मलिक म्हणाले. कोणीही हातात दगड तलवार घेण्याची भाषा करू नये, हे कायद्याचे राज्य असल्याचे मलिक म्हणाले.

हेही वाचा - 'जास्त नाटकं कराल तर दगडाला दगडाने आणि तलवारीला तलवारीने उत्तर दिलं जाईल'

हेही वाचा - 'सीएए'मध्ये गैर काय, माझा देश म्हणजे धर्मशाळा नव्हे - राज ठाकरे

प्रत्येक राजकीय पक्षाला स्वतःची भूमिका स्विकारायचा अधिकार असतो. काही राजकीय पक्ष मोर्चे काढतात, पण त्यांच्या मागे कोणीतरी आहे, असा अप्रत्यक्ष टोला नवाब मलिक यांनी यावेळी लगावला. अशा मोर्चामुळे सरकारला काही फरक पडत नाही. दगडाची आणि तलवारीची भाषा करून राज्यात अशांतता पसरवण्याचे कोणीही प्रयत्न करू नये. आम्ही गांधीवादी असताना हिंसा सहन होणार नाही असेही नवाब मलिक म्हणाले.