मुंबई : या नवीन वर्षात तरुणाईच्या प्रेमाचा गंध महाराष्ट्रभर पसरणाऱ्या दोन कथा (Marathi New Serial) प्रेक्षकांच्या भेटीला (Coming Soon) येत आहेत. 'रमा राघव' (Rama Raghav) आणि 'पिरतीचा वनवा उरी पेटला' (Pirticha Vanava Uri Petla) या नव्या कोऱ्या मालिका वेगवेगळे स्वभाव, राहणीमान आणि विचार असणाऱ्या दोन नायिकांच्या कथा आहेत. प्रत्येक गोष्टीची सुरुवात ही सकारात्मक नसू शकते. अगदी तसंच प्रत्येक प्रेमकथेचा आरंभ हा गोड होतोच असे नाही. असं म्हणतात, एकमेकांचा तिरस्कार करणारी, भिन्न स्वभावाची आणि भिन्न विचारसरणीची दोन माणसं कधीही एकत्र येऊ शकत नाहीत. पण प्रेमात द्वेषाला सुद्धा मात देण्याची ताकद असते. कधी कधी आपल्या मनामध्ये गैरसमजुतीचं जाळं असतं आणि ते काही केल्या दूर होत नाही, पण जेव्हा होतं तेव्हा एकतर वेळ निघून गेलेली असती किंवा ती व्यक्ती आपल्या आयुष्यातून निघून गेली आहे का? अशी परिस्थिती उभी राहते. पहिल्या नजरेत आपल्याला जशी एखादी व्यक्ती दिसते ती तशी असेलच असं काही सांगता येत नाही.
वेगवेगळ्या स्वभावाच्या मुलींच्या मालिका :कलर्स मराठी वर प्रसारित होणाऱ्या 'रमा राघव' आणि 'पिरतीचा वनवा उरी पेटला' मालिकांमधील दोन नायिकांमधील एक मनमोकळी आहे. तर दुसरी बेधडक. एक जरा उद्धट आहे, तर दुसरी स्पष्टवक्ती. दोघींचा आयुष्याकडे बघण्याचा दृष्टिकोन आणि व्याख्या वेगवेगळ्या आहेत. जेव्हा या मुलींच्या आयुष्यात त्यांच्याहून वेगळ्या स्वभावाच्या दोन व्यक्ती येतील, तेव्हा त्यांचं आयुष्य किती बदलेल आणि ज्यांची ओळखच मुळात गैरसमजुती मधून झाली आहे; त्यांच्यात प्रेम कसं फुलेल हे या मालिकांमधून दिसेल.
पिरतीचा वनवा उरी पेटलाचे कथानक :'पिरतीचा वनवा उरी पेटला' चिन्मय मांडलेकर यांनी लिहिलेल्या या कथेची निर्मिती पोतडी प्रॉडक्शन्सने केली असून; सावीची भूमिका रसिका वखारकर आणि अर्जुनची भूमिका इंद्रनील कामत साकारणार आहेत. रमा राघव रोहिणी निनावे लिखित मालिकेची निर्मिती क्रिएटिव्ह ट्रान्समीडिया यांनी केली आहे. अभिनेत्री ऐश्वर्या शेटेचा तिखट अंदाज तर अभिनेता निखिल दामलेचा प्रसन्न गोडवा यामुळे खट्याळ प्रेमाची ही ‘तिखटगोड’ गोष्ट आहे. या धमाल युवा जोडीबरोबरच सुहिता थत्ते, गौतम जोगळेकर, शीतल क्षीरसागर, सई रानडे, प्राजक्ता केळकर, अर्चना निपाणीकर, राजन जोशी, कांचन पगारे अशी भली मोठी स्टार कास्ट या मालिकेत आहे.
रमा राघव आणि पिरतीचा वनवा उरी पेटला
रमा राघवचे कथानक : ‘रमा राघव’ मध्ये दोन अतिशय विरुद्ध कौटुंबिक वातावरणातून आलेल्या रमा आणि राघव यांच्यातील संघर्षाची आणि त्यातून पुढे फुलणाऱ्या प्रेमाची ही तिखट गोड गोष्ट आहे. संस्कार, संस्कृती, परिश्रम याशिवाय आयुष्यात काही मिळत नसतं याची शिकवण अंगी भिनलेला राघव तर पैशांनी काहीही विकत घेता येतं आणि अशक्य असे काही नसते असा विचार करणारी, अहंकारी रमा यांचा सामना होतो आणि या भांडणातूनच प्रेम फुलायला लागतं. आयुष्यात आदर्श, तत्व, मूल्य यांचं महत्व नवीन पिढीला हलक्या फुलक्या रीतिने पटवून देण्याचा प्रयत्न या मालिकेद्वारे केला जाणार आहे.
लवकरच होणार प्रसारित : 'पिरतीचा वनवा उरी पेटला' मालिकेतील सावी आत्ताच्या पिढीतील मनमोकळी अशी मुलगी आहे. सावी जरी चोरी करत असली तरीदेखील आपल्याकडून कुठल्याही चांगल्या आणि गरीब माणसाला लुटलं जाऊ नाही, असं तिचं सूत्र आहे. ज्या शाळेसाठी तिनं आयुष्यात पहिल्यांदा चोरी केली ती शाळा आपल्या पायावर उभी राहावी अशी तिची इच्छा आहे. सावीचे आयुष्य पूर्णपणे बदलणार आहे या गोष्टीशी अनभिज्ञ सावी कवठेभैरव गावात येते. आणि तिथे तिची भेट अर्जुनशी होते. अर्जुन गावातील मोठं प्रस्थ आहे आणि तो अतिशय तिरसट, संयमी, धोरणी पण तापट, दिलदार पण खुनशी आहे. तो त्या गावातला एक कर्तबगार तरुण आहे. त्याने घर, व्यवसाय आणि घरातला कारभार सांभाळला आणि सगळ्यांना आपल्या टाचेखाली आणलं. आता जेव्हा सावी आणि अर्जुन भेटतील, तेव्हा यांच्या प्रेमकथेचा करार कसा रंगेल आणि ते दोघे बंधनात अडकतात का याचा उलघडा मालिकेतून होईल. 'रमा राघव' आणि 'पिरतीचा वनवा उरी पेटला' या मालिका येत्या ९ जानेवारीपासून अनुक्रमे रात्री ९.०० वा. व १० वा. कलर्स मराठीवर प्रसारित होणार आहे.
