मुंबईकरांनी निसर्गाशी दोस्ती करावी - महापौर

निसर्गाशी मी दोस्ती केली आहे, त्याचा फायदा मला झाला आहे. पर्यावरणाचे रक्षण करण्यासाठी आपण स्वतः मुंबईचे प्रथम नागरिक म्हणून पुढाकार घेतल्याचे महापौरांनी सांगितले.

मुंबई - मुंबईमधील प्रदूषणाचा प्रश्न नेहमीच उपस्थित केला जातो. यावर उपाय म्हणून पर्यावरणाचे रक्षण करण्यासाठी सर्वांनी पुढाकार घेण्याची गरज आहे. त्यासाठी मुंबईकरांनी निसर्गाशी दोस्ती करावी, असे आवाहन महापौर किशोरी पेडणेकर यांनी केले आहे. निसर्गाशी मी दोस्ती केली आहे, त्याचा फायदा मला झाला आहे. पर्यावरणाचे रक्षण करण्यासाठी आपण स्वतः मुंबईचे प्रथम नागरिक म्हणून पुढाकार घेतल्याचे महापौरांनी सांगितले. मुंबई महापालिकेच्या भायखळा राणीबागेत झाडे आणि फुलांचे प्रदर्शन भरवण्यात आले आहे. या प्रदर्शनाचे उद्घाटन महापौर किशोरी पेडणेकर यांच्या हस्ते करण्यात आले. त्यावेळी आयोजित कार्यक्रमात महापौर बोलत होत्या.

पुढे त्या म्हणाल्या, निसर्गाबरोबर राहायला पाहिजे, असे आपण नेहमी बोलतो. मात्र, आपण असे करत नाही. यामुळे मी स्वतःपासून निसर्गाशी मैत्री करण्यास सुरुवात केली आहे. महापालिका मुख्यालयातील महापौर कार्यालयात आतापर्यंत खिडक्या बंद असायच्या. यामुळे मोकळी हवा येत नव्हती. मी महापौर झाल्यावर ताजी हवा कार्यालयात यावी म्हणून खिडक्या उघड्या ठेवल्या आणि माझी बसण्याची जागाही बदलली. मात्र, यामुळे माझ्यावर वास्तूशास्त्राप्रमाणे कार्यालयात बदल केल्याचा आरोप करण्यात आला. आता माझ्या कार्यालयात चांगली नैसर्गिक खेळती हवा असल्याने माझा दम्याचा त्रास कमी झाल्याचे महापौरांनी सांगितले.

हेही वाचा -शेतकऱ्यांच्या हातावर तुरी.. हमीभावापेक्षा कमी दराने तुरीची खरेदी

किचन, टेरेसवर उद्यान उभारा -

सध्या किचनमध्ये आणि इतर ठिकाणी गार्डन बनवण्याचा सल्ला देणाऱ्या कंपन्या सुरू झाल्या आहेत. त्यांच्याकडून सेंद्रिय शेतीद्वारे निर्माण होणारे अन्नपदार्थ (organic food) खाण्याचे आवाहन केले जाते. यामधून त्या कंपन्यांचे फावत असल्याने अशी उद्याने आपणच उभारली पाहिजेत. आपल्या किचनमध्ये आपण ओवा, टोमॅटो आदी झाडे लावून चांगले उद्यान निर्माण करू शकतो. घराच्या छतावर, इमारतीच्या छतावरही उद्यान निर्माण करता येऊ शकते. त्यामुळे नागरिकांनी झाडे लावली पाहिजेत, असे आवाहन महापौरांनी केले.

हेही वाचा -मुख्यमंत्री महाबळेश्वरमध्ये, मात्र पर्यटक झाले नाराज

महापौर बंगल्यापासून सुरुवात -

पर्यावरणाचे रक्षण करण्यासाठी महापौर बंगल्यापासून सुरुवात करण्यात आली आहे. बंगल्यातील ओला कचऱ्यापासून गांडूळ खत प्रकल्प सुरू करण्यात आला आहे. वाया जाणाऱ्या पाण्यावर एसटीपी प्लान्टमध्ये प्रक्रिया केली जाते. त्यामधील पिण्याव्यतीकरिक्त पाणी इतर कामासाठी वापरले जाते. अशा पाण्यापासून महापौर बंगल्यामधील बाग फुलवली जात असल्याचे महापौरांनी सांगितले. मुंबईमध्ये पाऊस पडावा म्हणून मियावाकी पद्धतीचे उद्यान उभारली जात आहेत. राणीबागेत पेंग्विन आल्यावर टीका करण्यात आली. मात्र, त्यानंतर पर्यटक वाढले. राणीबागेत नवे पिंजरे बांधले आहेत. त्यात नवे प्राणी आले आहेत. आणखीही काही प्राणी येणार आहेत. त्यामुळे राणीबागेत आणखी पर्यटकांची संख्या वाढणार असल्याचेही महापौर पेडणेकर यांनी सांगितले.