मुंबई - महाविकास आघाडीचे सरकार हे किमान समान कार्यक्रमावर एकत्र आले असल्याची माहिती शिवसेनेचे गटनेते एकनाथ शिंदे यांनी दिली. तसेच हे नवीन सरकार भारतीय संविधानाच्या तत्व आणि मूल्यांवर चालणार आहे. तसेच आमच्या सरकारमध्ये शेतकरी केंद्रस्थानी असेल. ही महाविकासआघाडी राज्याला विकासाच्या मार्गावर पुढे नेण्यासाठी कटीबद्ध असल्याचेही शिंदे म्हणाले.
थोड्याच वेळात शिवसेना पक्षप्रमुख उद्धव ठाकरे हे मुख्यमंत्री पदाची शपथ घेणार आहेत. तत्पूर्वी शिवसेना, राष्ट्रवादी, काँग्रेस आणि मित्रपक्षांच्या महाविकास आघाडीची संयुक्त पत्रकार परिषद झाली. राष्ट्रवादी काँग्रेसचे प्रदेशाध्यक्ष जयंत पाटील, काँग्रेसचे गटनेते बाळासाहेब थोरात, राष्ट्रवादीचे प्रवक्ते नवाब मलिक, शिवसेनेचे गटनेते एकनाथ शिंदे यांनी संयुक्त पत्रकार परिषद घेतली. त्यावेळी ते बोलत होते. आमची एक मजबूत आघाडी तयार झाली आहे. जनतेच्या हितासाठी काम करणारी, मूल्य, तत्व केंद्रस्थानी ठेऊन आम्ही काम करणार आहोत. राज्याला विकासाच्या मार्गावर पुढे नेण्यासाठी आम्ही कटीबद्ध असल्याचे शिंदे म्हणाले.