Maharashtra Weather : पाऊस पुन्हा सक्रिय; महाराष्ट्रातील अनेक जिल्ह्यांमध्ये 'यलो अलर्ट'

Maharashtra Weather : मुंबईत गुरुवारी सकाळपासून मुसळधार पाऊस पडत असून, आज रात्री आणखी पावसाची शक्यता आहे. त्यासोबतच हवामान खात्यानं शुक्रवारी महाराष्ट्रातील अनेक जिल्ह्यांमध्ये 'यलो अलर्ट' जारी केलाय. जाणून घेण्यासाठी वाचा पूर्ण बातमी..

मुंबई Maharashtra Weather :भारतीय हवामान खात्यानं (IMD) महाराष्ट्रातील अनेक जिल्ह्यांमध्ये शुक्रवारसाठी 'यलो अलर्ट' जारी केला आहे. आयएमडीनं मुंबई, ठाणे, पालघर, रायगड, रत्नागिरी, धुळे, जळगाव आणि नाशिक या जिल्ह्यांमध्ये अलर्ट जारी केला.

महाराष्ट्रात पुढील ३ दिवस मुसळधार पाऊस : पश्चिम मध्य प्रदेश, महाराष्ट्र आणि गुजरातला पुढील ३ दिवसांत मुसळधार पावसाचा सामना करावा लागेल, असं आयएमडीनं 'X' वर केलेल्या पोस्टमध्ये म्हटलं. तसेच उत्तर महाराष्ट्र, गुजरात आणि मध्य प्रदेशासह भारताच्या अनेक भागांमध्ये गडगडाटासह हलका ते मध्यम पाऊस पडण्याचा अंदाज हवामान खात्यानं वर्तवला आहे. मुंबईत गुरुवारी सकाळपासून मुसळधार पाऊस पडत असून, आज रात्री आणखी पाऊस पडण्याची शक्यता हवामान खात्यानं वर्तवली आहे.

या भागात हलक्या ते मध्यम पावसाची शक्यता : हवामान खात्यानं महाराष्ट्रातील काही भाग, पूर्व उत्तर प्रदेश, दक्षिण बिहार, ओडिशा, पश्चिम बंगाल, झारखंड, आसाम, मेघालय, नागालँड, मणिपूर, मिझोरम आणि त्रिपुरा येथे विजांच्या कडकडाटासह हलक्या ते मध्यम पावसाची शक्यता वर्तवलीय. या भागांमध्ये शुक्रवारी रात्री पाऊस पडू शकतो, असं आयएमडीनं 'X' वरील पोस्टमध्ये सांगितलं.

हेही वाचा :Maharashtra Rain Update : शेतकऱ्यांसाठी आनंदाची बातमी; सप्टेंबरमध्ये राज्यात समाधानकारक पाऊस

मुंबईत आजही पावसाची शक्यता : मुंबई आणि आजूबाजूच्या प्रदेशात गुरुवार सकाळपासूनच मुसळधार पावसाची नोंद झाली. मुंबईतील साताक्रूझ येथे ९२. ५ मिमी, कुलाबा ४३.६ मिमी, दहिसर ७१.० मिमी, जुहू ८४ मिमी, राममंदिर ८८ मिमी, माटूंगा ७५.५ मिमी आणि सायन ७५.२ पावसाची नोंद झाली. शुक्रवारी रात्रीच्या वेळी मुंबईत हलका ते मध्यम पाऊस पडण्याची शक्यता असल्याचं आयएमडीनं म्हटलंय.

या राज्यांमध्ये पावसाचा अंदाज : गुरुवारी हवामान खात्यानं उत्तर प्रदेशच्या काही भागात हलक्या ते मध्यम पावसाचा अंदाज वर्तवला होता. तसेच केरळ, तामिळनाडू, आंध्र प्रदेश, अंदमान आणि निकोबार बेटं, सिक्कीम, लडाख, अरुणाचल प्रदेश, राजस्थान आणि तेलंगणा येथे हलक्या ते मध्यम पावसाचा अंदाज वर्तवण्यात आला आहे.

हेही वाचा :Maharashtra Weather : मराठवाड्यात पावसाची दडी; शेतकरी अडचणीत, 'या' तालुक्यात भीषण पाणीटंचाई