आगामी लोकसभा निवडणूकीत महायुतीतील पक्ष किती जागा लढवणार? देवेंद्र फडणवीसांनी थेट फॉर्म्युलाच सांगितला

Devendra Fadnavis on Lok Sabha Election : लोकसभा निवडणुकांच्या प्रचाराचा नारळ हिवाळी अधिवेशनानंतर फुटणार असल्याची माहिती देवेंद्र फडणवीसांनी दिली आहे. तसंच उपमुख्यमंत्री देवेंद्र फडणवीसांनी जागा वाटपाचा फॉर्म्युलाही सांगितलाय. यावरुन आता राजकारणात निवडणुकीतील जागा वाटापावरून रस्सीखेच सुरू होणार आहे.

मुंबई Devendra Fadnavis on Lok Sabha Election: राज्यातील शिंदे, फडणवीस व अजित पवार या महायुतीच्या सरकारमध्ये आगामी 2024 लोकसभा निवडणूकीच्या महाराष्ट्रातील जागा वाटपावरून तिढा निर्माण झाल्याची चर्चा आहे. परंतु, यावर राज्याचे उपमुख्यमंत्री देवेंद्र फडणवीस यांनी एका माध्यमाला दिलेल्या मुलाखतीत मोठं भाष्य केलंय. यामुळं सध्या राजकीय वर्तुळात अनेक चर्चांना उधाण आलंय. भाजपा 26 जागांवर लढणार असून एकनाथ शिंदे यांची शिवसेना व अजित पवार यांची राष्ट्रवादी काँग्रेस 22 जागांवर लढणार असल्याचं वक्तव्य उपमुख्यमंत्री देवेंद्र फडणवीस यांनी मुलाखतीत केलंय. मात्र, याबाबत अद्याप मुख्यमंत्री एकनाथ शिंदे किंवा उपमुख्यमंत्री अजित पवार यांच्याकडून कुठलीही प्रतिक्रिया आलेली नाही.

फडणवीसांनी सांगितवलेला महायुतीचा फॉर्म्युला काय : राज्यात लोकसभा निवडणूकीत भाजपानं मिशन 45 अंतर्गत कंबर कसलीय. यात राज्यातील एकूण 48 जागांपैकी भाजपा 26 जागा तर एकनाथ शिंदे यांची शिवसेना व अजित पवार यांची राष्ट्रवादी काँग्रेस 22 जागांवर लढणार असल्याचं उपमुख्यमंत्री देवेंद्र फडणवीस यांनी या मुलाखतीत सांगितलंय. राज्यात एकनाथ शिंदे यांनी उद्धव ठाकरे मुख्यमंत्री असताना शिवसेनेत बंड करून भाजप सोबत जाण्याचा निर्णय घेतला. त्यानंतर राज्यात शिंदे फडणवीस सरकार स्थापन झालं. त्यानंतर अजित पवार यांनी राष्ट्रवादी काँग्रेसमध्ये फूट पाडत ते शिंदे फडणवीस सरकारमध्ये सामील झाले. राज्यात शिंदे, फडवणीस अजित पवार या महायुतीचे सरकार अस्तित्वात आले. परंतु, या सरकारमध्ये येणाऱ्या लोकसभा निवडणुकीच्या अनुषंगानं जागा वाटपाचा तिढा निर्माण झाला. 2019 च्या निवडणुकीमध्ये भाजपाने 25 तर त्यांची सहयोगी उद्धव ठाकरे यांच्या गटानं (पूर्वीची शिवसेना) 23 जागा लढवल्या होत्या. त्यापैकी भाजपानं 23 तर शिवसेनेनं 18 जागा जिंकल्या होत्या.

उमेदवाराच्या विजयाची शाश्वती : जागा वाटपाच्या निकषांवर बोलताना उपमुख्यमंत्री देवेंद्र फडणवीस म्हणाले की, राष्ट्रवादी काँग्रेस आणि शिवसेनेच्या नेत्यांसोबत झालेल्या अनौपचारिक बैठकीदरम्यान निवडक गुणवत्ता त्याचबरोबर विद्यमान खासदारांचे नामांकन हे उमेदवार निवडीचं मुख्य सूत्र असणार आहे. राज्यातील सर्व 48 लोकसभा मतदारसंघाचं सर्वेक्षण आमच्याकडून पूर्ण झालं आहे. विजयी होण्याची शक्यता असलेल्या उमेदवारांची प्राथमिक माहिती प्राप्त झालीय. उमेदवारांच्या निवडीसाठी विद्यमान खासदारांची गुणवत्ता महत्त्वाची असणार आहे. 2019 मध्ये निवडून आलेल्या उमेदवारांना पुन्हा उमेदवारी देण्याबाबत व ते पुन्हा निवडून येण्याची क्षमता किती प्रमाणात आहे. याबाबत तपासणी करण्यात आली आहे.

अधिवेशनानंतर जागा वाटपाची पुढील चर्चा होणार-फडणवीस पुढं म्हणाले की जागा वाटपाबाबत अंतिम निर्णयावर शिक्का मुहूर्त अजून व्हायचं असून याबाबत अनेक चर्चा होणं बाकी आहेत. परंतु, यंदा महायुती राज्यात लोकसभेच्या 40 ते 42 जागा जिंकेल असंही ते म्हणाले. सध्या राज्यातील व देशातील परिस्थिती जनतेला ठाऊक असून जनता पंतप्रधान नरेंद्र मोदी यांच्या पाठीशी आहे. त्यामुळं यंदा 2019 च्या निकालापेक्षा 2024 चा निकाल हा मोठ्या प्रमाणात असेल असंही ते म्हणाले. पुढील महिन्यांत 7 डिसेंबरपासून नागपूरमध्ये हिवाळी अधिवेशनाला सुरुवात होत आहे. लोकसभेच्या जागा वाटपाबाबत चर्चा व पुढची सूत्र ही अधिवेशनानंतर अंतिम केली जातील, असंही फडणवीस यांनी म्हटलंय.

मराठ्यांना आरक्षण देणे प्राथमिकता-सध्या राज्यात ज्वलंत झालेल्या मराठा आरक्षणाच्या प्रश्नावर बोलताना देवेंद्र फडणवीस म्हणाले की, ते मुख्यमंत्री (२०१४-२०१९) असताना यादरम्यान मराठ्यांना आरक्षण देण्यासाठी कायदा करण्यात आला. पण हा कायदा सर्वोच्च न्यायालयानं रद्द केला. आता आम्ही सर्वोच्च न्यायालयानं उपस्थित केलेल्या मुद्द्यांचे बारकाईने निरीक्षण केले आहे. त्यासाठी एका तज्ज्ञांची समिती स्थापन केली आहे. मराठ्यांना आरक्षण देत असताना ओबीसींना देण्यात आलेल्या आरक्षणाला कोणत्याही प्रकारे धक्का लागणार नाही. याची काळजी घेतली जाणार असल्याचेही देवेंद्र फडणवीस यांनी सांगितले आहे. त्याचबरोबर राज्यभरातील आंदोलकांनी उपस्थित केलेल्या समस्यांबाबत आमचे सरकार निश्चितच चिंतित आहे. सौहार्दपूर्ण आणि कायद्याच्या चौकटीत राहून सोडवण्यासाठी आम्ही प्रयत्न करत आहोत. परंतु काही राजकीय पक्ष सध्याच्या परिस्थितीचा वाजवी फायदा घेत असल्याने हे फार दुर्दैवी असल्याचंही फडणवीस म्हणाले आहेत.

हेही वाचा :