MLA Disqualification Hearing : तब्बल तीन तास झाली आमदार अपात्रतेची सुनावणी; 'या' मागणीवरुन मतभेद

Maharashtra Politics Crisis : विधानसभा अध्यक्ष राहुल नार्वेकर दिल्लीत होणाऱ्या जी - 20 देशांच्या सभागृह अध्यक्षांच्या बैठकीला जाणार असल्यानं सुनावणीच्या वेळापत्रकात बदल करण्यात आल्याचं सांगितलं जातंय.

मुंबई : MLA Disqualification Hearing : विधानसभा अध्यक्ष राहुल नार्वेकरांसमोर गुरुवारी आमदार अपात्रतेसंदर्भातील सुनावणी झाली. ही सुनावणी शुक्रवारी होणार होती. मात्र, जी-20 कार्यक्रमानिमित्त दिल्लीला जावं लागणार असल्यानं हा निर्णय घेतल्याचं विधानसभा अध्यक्ष राहुल नार्वेकरांनी स्पष्ट केलंय. यामुळं गुरुवारी दुपारी विधानसभा अध्यक्षांसमोर आमदार अपात्रतेची सुनावणी झाली.

सुनावणीत काय झालं : विधानसभा अध्यक्षांनी गुरुवारी शिवसेना आमदार अपात्रतेच्या मुद्द्यावर (Shiv Sena Mla Disqualification) सुनाावणी घेतली. जवळपास तीन तास ही सुनावणी सुरू होती. शिंदे गटाच्या वकिलांनी प्रत्येक आमदाराची सुनावणी एकत्रितपणे घ्यावी अशी मागणी केली. तर, ठाकरे गटाच्या वकिलांनी या मागणीला विरोध केलाय. आता याबाबतचा निकाल 20 ऑक्टोबर रोजी विधानसभा अध्यक्ष सुनावण्याची शक्यता आहे. त्यामुळं आता सुनावणी एकत्र होणार की वेगवेगळी होणार हे आता लवकरच स्पष्ट होणार आहे.

२० तारखेपर्यंत निर्णय? : गुरुवारी झालेल्या सुनावणीमध्ये शिंदे गटाच्या वतीनं युक्तिवाद करताना वकील देवदत्त कामत यांनी सर्व आमदारांना वैयक्तिक बाजू मांडण्याचा अधिकार आहे. ठाकरे गटाच्या आमदारांची जरी मागणी असली की एकत्र सुनावणी घेतली जावी. तर तसं केल्यानं शिंदे गटाच्या आमदारांवर अन्याय झाल्यासारखं होणार आहे. त्या कारणास्तव याचिका एकत्र केल्या तर तो त्यांचा अधिकार राहणार नाही, असं स्पष्ट केलंय. या प्रकरणी आम्ही अध्यक्षांना लवकर याबाबत सुनावणी घेण्यास सांगितलं असून, २० तारखेपर्यंत निर्णय अपेक्षित असल्याचं कामत यांनी सांगितलंय.

पुन्हा सर्वोच्च न्यायालयात जावं लागेल :दुसरीकडे गुरुवारच्या सुनावणीनंतर ठाकरे गटाचे नेते अनिल देसाई म्हणाले की, कायद्याचा किस पाडण्याचा वारंवार प्रयत्न होत आहे. शिंदे गटांच्या आमदारांच्या डोक्यावर अपात्रतेची तलवार लटकत असून, ते टाळण्यासाठी हे सर्व सुरू आहे. याप्रकारे फक्त चाल ढकल करण्यात येत आहे. याप्रकरणी एकत्र सुनावणी का नको? असा अध्यक्षांनीसुद्धा प्रश्न विचारला आहे. परंतु एकंदरीत चित्र हे असं दिसतं की, या प्रकरणी लवकर निर्णय येणार नाही. म्हणून आम्हाला पुन्हा एकदा याबाबत सर्वोच्च न्यायालयात दाद मागावी लागणार आहे.

शिंदे गटाचे आमदार अपात्र : ठाकरे गटाचे नेते, आमदार सुनील प्रभू म्हणाले की, शेड्युल १० प्रमाणे शिंदे गटाचे आमदार हे अपात्र आहेत. आम्हाला, जनतेला व महाराष्ट्राला जे अपेक्षित आहे ते सर्वांना माहिती आहे. याप्रकरणी अध्यक्षांनी एकत्र सुनावणी घेऊन लवकरात लवकर निर्णय द्यावा हीच आमची अपेक्षा आहे. या प्रकरणाचे चित्र एकदम स्पष्ट असून, निर्णय आमच्या बाजूने आहे.

शुक्रवारी होणार होती सुनावणी : गेल्या अनेक दिवसांपासून आमदार अपात्रतेची सुनावणी लांबत चालली होती. याप्रकरणी सुप्रीम कोर्टानं विधानसभा अध्यक्ष राहुल नार्वेकरांना चांगलंच सुनावलं होतं. यानंतर या सुनावणीच्या घडामोडींना वेग आला होता. शिवसेना आमदार अपात्रतेच्या प्रकरणावर 13 ऑक्टोबरला सुनावणी होणार होती. मात्र, विधानसभा अध्यक्ष राहुल नार्वेकरांकडून या वेळापत्रकात बदल करण्यात आला होता. यानुसार ही सुनावणी गुरुवारी झाली.

विधानसभा अध्यक्ष दिल्ली दौऱ्यावर :दरम्यान, शुक्रवारची सुनावणी झाल्यावर विधानसभा अध्यक्ष राहुल नार्वेकर हे दिल्ली दौऱ्यावर जाणार आहेत. जी-20 देशांच्या सभागृह अध्यक्षांच्या बैठकीसाठी ते दिल्लीला जाणार असले तरी सुप्रीम कोर्टाच्या सुनावणी आधी या प्रकरणावर दिल्लीत कायदेशीर खलबतं होणार असल्याची चर्चा राजकीय वर्तुळात सुरू आहे. तसंच राहुल नार्वेकर दिल्लीत सॉलिसिटर जनरल तुषार मेहतांची भेट घेणार असल्याची माहिती आहे. ठाकरे आणि राष्ट्रवादीच्या शरद पवार गटानं राहुल नार्वेकर यांच्यावर आमदारांच्या अपात्रतेबाबत सुनावणीमध्ये दिरंगाई करत असल्याचा आरोप करत सर्वोच्च न्यायालयात याचिका दाखल केलीय.

हेही वाचा :