मुंबई -अंडरवर्ल्ड डॉन दाऊद इब्राहिम याच्या इशाऱ्यावर मुंबईसह देशभरात सणासुदीत घातपात घडवण्याचा डाव दिल्ली पोलिसांनी उधळून लावला. या प्रकरणी दहशतवाद विरोधी पथकाने शुक्रवारी (दि. 17 सप्टेंबर) नागपाडा परिसरातून एकास अटक केली होती. रविवारी आणखी एका मुंब्रा परिसरातून अटक करण्यात आली आहे. इम्रान उर्फ मुन्ना, असे अटकेत असलेल्या आरोपीचे नाव आहे.
मिळालेल्या माहितीनुसार, दिल्ली पोलिसांच्या स्पेशल सेलने मंगळवारी (दि. 14 सप्टेंबर) पाकिस्तानच्या हँडलरकडून चालविल्या जाणाऱ्या दहशतवादी मॉड्यूलचा पर्दाफाश केला होता. या मॉड्यूलशी संबंधित सहा जणांना या प्रकरणात अटक करण्यात आली होती. त्यापैकी दोन जण पाकिस्तानातून प्रशिक्षण घेऊन आलेले होते. सणासुदीच्या कालावधी दरम्यान दिल्ली, उत्तर प्रदेश, महाराष्ट्रात स्फोट घडविण्याचा कट ते रचत होते. त्यांच्या चौकशीदरम्यान पोलिसांना कळाले की, मुंबईचा रहिवासी झाकीरही त्यांच्यासोबत कटात सहभागी होता. यानंतर ही माहिती मुंबई पोलिसांना देण्यात आली. त्यानंतर मुंबई पोलिसांनी झाकीरला नागपाड्यातून ताब्यात घेतले होते.
झाकीरने जानला दिला होता स्फोटकांची डिलिव्हरी घेण्याचा टास्क
दिल्लीत अटक करण्यात आलेल्या मुंबईच्या जान मोहम्मदला हत्यार आणि स्फोटकांची डिलिव्हरी घेण्यास झाकीरने सांगितले होते. झाकीरने नेमके कोणाच्या आदेशावरून हत्यारे आणि स्फोटकांची डिलिव्हरी घेण्यास सांगितले होते, याचा खुलासा आता एटीएसच्या चौकशीतून होण्याची शक्यता आहे.
दहशतवाद्यांच्या रडारवर मुंबई लोकल, लोकलमध्ये विषारी गॅस सोडण्याचा कट
खास करून या दहशतवाद्यांच्या निशाण्यावर मुंबई लोकल असल्याची माहिती तपास यंत्रणेला मिळाली आहे. मुंबई लोकलमध्ये मोठ्या प्रमाणात गर्दी असते. गर्दी असलेल्या वेळी मुंबईच्या लोकल मध्ये विषारी गॅस सोडून अधिकाधिक लोकांना मारण्याचा कट दहशतवाद्यांकडून रचला जात होता. या कटासाठी काही स्थानकांची रेकी केली गेली होती का? याबाबत देखील आता तपास यंत्रणा कसून चौकशी करत आहेत. गुप्तचर विभागाकडून याबाबत रेल्वे प्रशासनाला अलर्ट देण्यात आलेला आहे. त्यानंतर मुंबईतील अनेक स्टेशनवर आता सुरक्षा व्यवस्थाही वाढवण्यात आल्या आहेत. तसेच मुंबई मधील महत्त्वाच्या स्टेशनवर आत आणि बाहेर जाणाऱ्या मार्गांवर सुरक्षाव्यवस्था रेल्वे प्रशासनाकडून वाढवण्यात आल्या आहेत.
रेल्वे अधिकाऱ्यांची सुरक्षा संदर्भात बैठक
14 सप्टेंबरला सहा दहशतवाद्यांना पकडल्यानंतर या दहशतवाद्यांच्या रडारवर मुंबई लोकल असल्यास ते कळतात 15 सप्टेंबरला रेल्वे अधिकार्‍यांनी बैठक बोलावली होती. या बैठकीत मुंबईतील महत्त्वाच्या रेल्वे स्टेशन आणि आजूबाजूच्या परिसराचे सुरक्षेत वाढ करण्याचे निर्देश या अधिकाऱ्यांनी दिले. तसेच रेल्वे परिसरात महत्त्वाच्या जागी सर्वांकडून तपासणी करणे, बॉम्बशोधक पथके, तसेच स्थानकावरील हमाल व बूटपॉलिश करणाऱ्या लोकांना संशयास्पद वस्तू आढळल्यास किंवा हालचाली आढळल्यास स्टेशन मास्तरांना याबाबत कळण्याच्या सूचना देण्यात आल्या आहेत.
मुंबईतील जान मोहम्मदच्या चौकशीनंतर कारवाई
दिल्ली पोलिसांच्या ताब्यात असलेला संशयित दहशतवादी जान मोहम्मद शेख यांच्या चौकशीसाठी मुंबई गुन्हे शाखा आणि महाराष्ट्र दहशतवाद विरोधी पथकाच्या चार जणांची टीम दिल्लीला पोहोचली आहे. जानची कसून चौकशी केली जात असून आणखी काही खुलासे समोर येण्याची शक्यता आहे. जानच्या चौकशीतून अनेक प्रकरणांचा उलघडा होऊ शकतो, असे अशी माहिती पुढे आली आहे. दरम्यान या दहशत वाद्यांच्या चौकशी दरम्यान मिळालेल्या माहितीनंतर महाराष्ट्र एटीएस आणि मुंबई पोलिसांच्या गुन्हे शाखेने संयुक्त रित्या कारवाई करत जोगेश्वरीमधून एकाला अटक केली आहे.
कुख्यात गुंड दाऊद इब्राहीम याच्या इशाऱ्यावर मुंबईसह देशभरात सणासुदीतील घातपात घडवण्याचा डाव दिल्ली पोलिसांनी उधळून लावलेला आहे. पोलिसांनी सहा दहशतवाद्यांना अटक केली आहे. यातील एक दहशतवादी जान मोहम्मद शेख मुंबईत वास्तव्याला असून त्याने मुंबईची रेकी केली होती. त्यामुळे एटीएसने त्यांच्या पत्नीसह मुलीला आणि रेल्वेचे तिकीट काढून देणारा असगर शेखला ताब्यात घेतले होते. मात्र, चौकशीनंतर त्यांना सोडून देण्यात आल्याची माहिती मिळत आहे.