मुंबई- शहरात आजचे तापमान ११ अंशांवर पोहोचले आहे. यंदाच्या हंगामातील सर्वात कमी तापमानाची नोंद करण्यात आली आहे. या थंडीने अनेक रेकॉर्ड ब्रेक केले आहेत.
मुंबईत गेल्या दहा वर्षातील सर्वात कमी तापमानाची नोंद, पारा ७ अंशावर
दिल्लीत झालेली गारपीट, सातत्याने दिशा बदलणारे वारे आणि दोन दिवसांपासून उत्तरेकडून वाहणारे वारे यामुळे मुंबईच्या कमाल व किमान तापमानात कमालीची घट झाली आहे.
प्रतिकात्मक छायाचित्र
मुंबई वेधशाळेने दिलेल्या माहितीनुसार, शुक्रवारी मुंबई परिसरात सकाळपासूनच गार वारे वाहू लागले. याचा परिणाम मुंबईतील कमाल तापमानावर होऊन शुक्रवारी सांताक्रुझ परिसरात पारा २४.२ अंशांपर्यंत खाली आला होता. तर शनिवारी पहाटे किमान तापमान ११ अंश सेल्सिअस इतके नोंदवले गेले. कुलाबा परिसरात १५.६ इतक्या किमान तापमानाची नोंद करण्यात आली असून, कमाल तापमान २४.५ अंश सेल्सिअस होते.
विशेष म्हणजे बोरीवली नॅशनल पार्क आणि आरे परिसरात पहाटे ७ अंश सेल्सिअस तापमानाची नोंद करण्यात आली. वातावरणातील या बदलांमुळे मुंबईकरांनी दिवसभर थंडीच्या ऋतुचा अनोखा अनुभव घेतला. दरम्यान, शनिवारपासून मुंबईत उष्ण वारे वाहणार असून, तापमान पुन्हा वाढणार आहे. परंतु १५ फेब्रुवारीपासून पुन्हा एकदा पारा घसरणार असल्याचे संकेत मिळाले आहेत.