15 ऑगस्ट विशेष : तिरंग्यालाही कोरोनाचा फटका; झेंडाविक्रीत प्रचंड घट

दरवर्षी उत्साहाने साजरा केला जाणारा स्वातंत्र्यदिन यावर्षी केवळ औपचारिकता म्हणून साजरा करण्यात येणार आहे. सरकारी आदेश पाळून सण-उत्सव साजरे केले जात आहेत. यामुळे चौकाचौकात होणारे झेंडावंदन यावेळी रद्द करण्यात आले आहे. झेंड्याची मागणीदेखील घटली आहे.

मुंबई - 15 ऑगस्टला झेंडा विक्रीचा व्यवसाय जोमात असतो. यावर्षी कोरोनामुळे स्वातंत्र्य दिनाचा उत्साह दरवर्षीप्रमाणे नसल्यामुळे तिरंग्यांची मागणी घटली आहे. त्यामुळे प्रचंड आर्थिक नुकसान झाल्याचे भायखळा येथील द फ्लॅग शॉपचे ग्यान शहा यांनी सांगितले.

कोरोनामुळे शाळा-महाविद्यालये बंद आहेत. शाळेतील विद्यार्थी आणि शाळेत होणारे स्वातंत्र्य दिन कार्यक्रमही रद्द झाले आहेत. दरवर्षी उत्साहाने साजरा केला जाणारा स्वातंत्र्यदिन यावर्षी केवळ औपचारिकता म्हणून साजरा करण्यात येणार आहे. सरकारी आदेश पाळून सण-उत्सव साजरे केले जात आहेत. यामुळे चौकाचौकात होणारे झेंडावंदन यावेळी रद्द करण्यात आले आहे. झेंड्याची मागणीदेखील घटली आहे. सिग्नलवर, रस्त्यारस्त्यांवर या दिवसात झेंडे विकणारे छोटे विक्रेते दिसून येतात. यंदा मात्र तेही दिसत नाही. मोठे झेंडे विक्रेत्यांनी देखील यावेळी झेंडेनिर्मिती कमी केली आहे. यावेळी गृहनिर्माण संस्थांकडून झेंड्याची मागणी कमी झाली आहे. फक्त सरकारी कार्यालयात होणाऱ्या झेंडावंदनासाठी झेंड्याची मागणी असल्याचे विक्रेत्यांनी सांगितले.

दरवर्षी होणाऱ्या स्वातंत्र्यदिनानिमित्त तिरंग्याची मागणी यावर्षी तुलनेने 80 टक्क्यांनी कमी आहे. यावर्षी अनेक गृहनिर्माण संस्थानी ऑर्डर दिली नाही. सामाजिक अंतराचे निकष असल्यामुळे बरेच लोक एकत्र येऊन झेंडावंदन करणे टाळतील, असे सध्या दिसत आहे. आमचे दुकान 1966 साली सुरू झाले आहे. या वर्षी मार्चमध्ये लॉकडाउन सुरू होताच झेंडा तयार करणारे टेलर्सही त्यांच्या गावी गेले, असे शहा यांनी सांगितले.