खासगी डॉक्टरांकडे सरकारचे दुर्लक्ष, मोफत पीपीई किट देण्याची घोषणा हवेतच

महागडे किट स्वतः खरेदी करत खासगी डॉक्टर रुग्णसेवा देत आहेत. यावर आता इंडियन मेडिकल असोसिएशन, महाराष्ट्रने नाराजी व्यक्त केली आहे. सरकारने लवकरात लवकर मोफत पीपीई किट उपलब्ध करून द्यावेत, अशी मागणी त्यांनी केली आहे.

मुंबई- कोरोना रुग्णांवर उपचार करणाऱ्या खासगी डॉक्टरांना मोफत पीपीई किट देण्यात येतील, अशी घोषणा राज्य सरकारने केली. ही घोषणा करून बरेच दिवस उलटले तरी मोफत पीपीई किट खासगी डॉक्टरांना मिळालेले नाहीत. त्यामुळे, महागडे किट स्वतः खरेदी करत डॉक्टर रुग्णसेवा देत आहेत. यावर आता इंडियन मेडिकल असोसिएशन, महाराष्ट्राने नाराजी व्यक्त केली आहे. सरकारने लवकरात लवकर मोफत पीपीई किट उपलब्ध करून द्यावेत, अशी मागणी त्यांनी केली आहे.

पीपीई किट मिळत नसल्याने तसेच रोज महागडे किट खरेदी करणे परवडत नसल्याने अनेक खासगी डॉक्टर घरी बसून आहेत. तर दुसरीकडे सरकार त्यांच्याविरोधात कारवाईचा बडगा उगारत आहे. त्यामुळे, आयएमएने पीपीई किट उपलब्ध करून देण्याची मागणी केली होती. ही मागणी सरकारने मान्य केली. पण प्रत्यक्षात धारावी वगळता मुंबईसह राज्यभरात कुठेही खासगी डॉक्टरांना मोफत पीपीई किट मिळालेले नाहीत, अशी माहिती आयएमए महाराष्ट्राचे अध्यक्ष डॉ. भोंडवे यांनी दिली आहे.

परिणामी अनेक डॉक्टर महागडे पीपीई किट खरेदी करत अथवा पीपीई किट विना रुगसेवा देत आहेत. दरम्यान, आतापर्यंत राज्यभरात 500 हून अधिक डॉक्टरांना कोरोनाची लागण झाली आहे. तर, 7 डॉक्टरांचा मृत्यू झाला आहे. तेव्हा सरकारने खासगी डॉक्टरांच्या सुरक्षिततेकडे लक्ष द्यावे आणि मोफत पीपीई किट उपलब्ध करून द्यावेत, अशी मागणी भोंडवे यांनी केली आहे.

मोफत पीपीई किट मिळत नाहीच, पण विकतही हे किट लवकर उपलब्ध होत नसल्याचे डॉक्टर पार्थिव संघवी यांनी सांगितले आहे. शिवाय 400-500 रुपयांचे किट 1200 ते 1500 रुपयांना विकले जात आहे. अनेक खासगी डॉक्टर जीवाची पर्वा न करता रुग्णसेवा देत आहेत. तेव्हा त्यांनाही मोफत पीपीई किट मिळावे, अशी मागणी डॉक्टर संघवी यांनी केली.